«Կիևը թևակոխել է պաշտպանության փուլ»․ Կլիչկո

Կիևը թևակոխել է ռուսական զավթիչներից պաշտպանության փուլ, այս մասին այսօր Korrespondent.net-ի փոխանցմամբ՝ հայտարարել է Կիևի քաղաքապետ Վիտալի Կլիչկոն։

«Քաղաքը թևակոխել է պաշտպանության փուլ։ Հիմա որոշ շրջաններում կրակոցներ և պայթյուններ են լսվում։ Ուկրաինացի զինվորականները ոչնչացնում են ռուսների դիվերսիոն խմբերը։ Որոշ դիվերսիոն խմբեր, ցավոք, արդեն ներթափանցել են մայրաքաղաք, և թշնամին ցանկանում է ծնկի բերել մայրաքաղաքը, իսկ մեզ՝ ձեզ հետ ոչնչացնել»,- ասել է Կլիչկոն։

Նա ընդգծել է, որ բոլորը, ովքեր կարող են պաշտպանել Կիևը, «պետք է միանան և օգնեն զինվորներին»։
«Զինված ուժերն այսօր հերոսություն և անձնազոհություն են ցուցաբերում՝ հանուն մեզ և պետության։ Ուկրաինական բանակը Կիևի շուրջ պաշտպանություն է կազմակերպել: Իրավիճակը բարդ է, բայց մենք հավատում ենք մեր զինված ուժերին, աջակցում և օգնում ենք նրանց»,–ասել է նա։
Կլիչկոն խնդրել է մայրաքաղաքի բնակիչներին կուտակել ջուր, սնունդ և տաք հագուստ, մնալ տանը և դուրս չգալ փողոց։