Երկուշաբթի, 23 փետրվարի, 2026 թ.
|
Ստեփանակերտում`   +3 °C

««Քաղաքական աշխարհն» իրեն ոչ թե Ուկրաինայի կամ ուկրաինացիների համար է «կոտորում», այլ՝ իր». Հակոբ Բադալյան

««Քաղաքական աշխարհն» իրեն ոչ թե Ուկրաինայի կամ ուկրաինացիների համար է «կոտորում», այլ՝ իր». Հակոբ Բադալյան
406
Չորեքշաբթի, 02 մարտի, 2022 թ., 02:12

Քաղաքական մեկնաբան Հակոբ Բադալյանի գրառումը․ «Ուկրաինական պատերազմի առաջին օրերից հայկական համացանցում անընդհատ հիշեցումներ են, որ 44-օրյա պատերազմում աշխարհը լուռ էր, իսկ Ուկրաինայի դեպքում «իրեն կոտորում» է:

Նախ, կարծում եմ՝ արժե արձանագրել, որ «քաղաքական աշխարհն» իրեն ոչ թե Ուկրաինայի կամ ուկրաինացիների, այլ իր համար է «կոտորում», որովհետև ուկրաինական հանրության տառապանքը դարձել է քաղաքական ռազմավարական կարևոր խնդիրներ լուծելու միջոց:

Խոշոր հաշվով, «աշխարհի»՝ իրեն կոտորելուց այդ տառապանքը չի նվազում: Այո՛, ավելանում են Ռուսաստանի խնդիրները թե՛ մարտադաշտում, թե՛ ռուսական տնտեսական դաշտում, բայց ուկրաինացիների տառապանքը չի նվազում բոլորովին: Ավելին, կարող ենք դիտարկել անգամ, որ Ռուսաստանի համար ավելացնելով այդ խնդիրները, մեծ հավանականությամբ, ավելացնում են նաև Ռուսաստանի ագրեսիվությունն ու դաժանությունը, ըստ այդմ՝ ուկրաինացիների տառապանքը:

44-օրյա պատերազմի դեպքում, քաղաքական աշխարհի ճնշող մեծամասնությունը լուռ էր, և ամբողջ քաղաքական աշխարհը՝ անգործ, որովհետև քաղաքական խնդիրների լուծումը պահանջում էր «չկոտորել իրեն»: Ինչո՞ւ էր այդպես կամ ինչու է այդպես:

Համաշխարհային կյանքն այդպես է միշտ: Սա երկար խոսակցության նյութ է: Այդ խոսակցությունը պետք է լիներ, և պետք է լինի Հայաստանի հասարակական-քաղաքական կյանքի առօրյա աշխատանքի մի մաս, ինչի համար պետք է ինստիտուցիոնալության որոշակի մակարդակ: Դրա համար երկրում պետք է բանակից բացի անվտանգության հարց դիտվեր որակյալ մեդիադաշտի ձևավորումը, որակյալ ուղեղային կենտրոնների ձևավորումը, որպեսզի Հայաստանի հանրությունն առավոտյան թերթերը բացելիս ոչ թե մի ուժի հանդեպ մյուս ուժի պատվերով բամբասանք կարդար կամ հետո լսեր այդ բամբասանքը տարատեսակ ռադիոլրատվականների մամուլի տեսություն համարվող թողարկումներով, այլ քաղաքական բովանդակություն»:

Աղբյուրը`   Հակոբ Բադալյան