«Օր առաջ պետք է ձևավորել «Հակաճգնաժամային մասնագիտացված խումբ»». Կարեն Ադոնց

Տնտեսագետ Կարեն Ադոնցը ֆեյսբուքյան իր էջում գրել է. «Նախ մի քանի խոսք այս կամ այն գործոնների ազդեցության վերաբերյալ «փորձագիտական գնահատականների» մասին, ինչպիսին են՝ ռուբլու փոխարժեքը, SWIFT-ից անջատելը, պատժամիջոցները, արտաքին գնաճը եւ այլն։ Որևէ գնահատական չի կարող լինել արժանահավատ՝ դրանց ազդեցությունը մեր տնտեսության վրա պայմանավորված է բազմաթիվ ներքին և արտաքին (անկանխատեսելի) գործոններով և զարգացումներով։
Գլոբալ ճգնաժամային իրավիճակների գոյացման պարագայում (անկախ թե ինչ կասեն փորձագետները, հանրությունը (նաև բիզնեսը) ունի 3 «վարքագծային գործիք», որոնք պետք է ակտիվանան՝
1. Բոլոր պարագաներում՝ բացառել խուճապային տրամադրությունները (առեւտրում, բանկային համակարգում, արտարժույթի շուկայում),
2. Գնել հնարավորինս շատ հայրենական արտադրանք,
3. Չսառեցնել զարգացմանն ու ընդլայնմանն ուղղված ներդրումային ծրագրերը։
Հիմա, ինչ վերաբերում է՝ «Հակաճգնաժամային մասնագիտացված խումբ» ձեւավորելու անհրաժեշտությանը։
Համաշխարհային տնտեսությունը մտնում է նոր՝ «տուրբուլենտ» փուլ։ Հավանական մարտահրավերներին՝ արագ, միասնական ու ճշգրիտ արձագանքելու նպատակով, հույժ կարեւոր է ունենալ «պրոֆեսիոնալ տնտեսագետներից» բաղկացած, մասնագիտացված խումբ, որը (ընդհանուր հայտարարի գալով) հստակ կձեւակերպի՝ մարտահրավերները, անհրաժեշտ ծրագրային քայլերը, այլընտրանքային մոտեցումները և այլն։
Խմբի «համախմբողական» առաքելությունը ապահովելու նպատակով, մասնագիտացված խմբի՝ 7 անդամներից 4-ը պետք է լինեն «անկախ տնտեսագետներ», մեկական մասնագետներ պետք է առաջադրվեն՝ Կառավարության, ԱԺ-ի իշխանական և ԱԺ-ի ընդիմադիր թևերի կողմից։
«Հակաճգնաժամային մասնագիտացված խումբն» իր միասնական ծրագրային մոտեցումները պետք է ներկայացնի՝ Հանրությանը, Կառավարությանը և ԱԺ-ին»: