Զելենսկու գրասենյակը հերքել է Կիևից նրա մոտալուտ տարհանման մասին լուրերը

Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը հերքել է լուրերն այն մասին, թե Միացյալ Նահանգները և Մեծ Բրիտանիան պատրաստվում են տարհանել Ուկրաինայի առաջնորդ Վլադիմիր Զելենսկիին Կիևից։ Այս մասին հայտնում է Strana-ն։

«Նախագահ Զելենսկին անձամբ երբեք նման ընտրություն չի ունեցել՝ հեռանալ, թե մնալ»,- ասել է նա։

Ավելի վաղ The Sun թերթը գրել էր, որ ամերիկյան և բրիտանական հատուկ ջոկատայինները պատրաստվում են տարհանել Զելենսկին Ուկրաինայից։

Մինչ այս The Washington Post-ը հայտնել էր, որ Միացյալ Նահանգների իշխանությունները պատրաստ են օգնել Ուկրաինայի նախագահ Վլադիմիր Զելենսկիին հեռանալ Կիևից։

Ամերիկացի և ուկրաինացի պաշտոնյաները հրապարակման մեկնաբանության մեջ նշել են, որ ԱՄՆ ղեկավարությունը պատրաստ է օգնել Ուկրաինայի առաջնորդին տարհանել Ուկրաինայի մայրաքաղաքից, որպեսզի «նա գերի չընկնի կամ չսպանվի ռուսական զորքերի առաջխաղացման հետևանքով»։

Ամերիկացի բարձրաստիճան պաշտոնյայի խոսքով՝ վերջին օրերին ԱՄՆ պաշտոնյաները Զելենսկու հետ քննարկել են «անվտանգության տարբեր հարցեր, այդ թվում՝ ամենաանվտանգ վայրերը նրա համար՝ ապահովելու նպատակով կառավարության շարունակականությունը»: