Iveco-ն դադարեցրել է բեռնատարների մատակարարումները Ռուսաստան և Բելառուս

Բեռնատարներ արտադրող իտալական Iveco Group-ը դադարեցրել է մեքենաների մատակարարումները Ռուսաստան և Բելառուս, հայտնել է ընկերության գործադիր տնօրեն Գերիտ Մարքսը։

Նա հավելել է, որ ավտոարտադրողը դիտարկում է ռուսական համատեղ ձեռնարկությունից (Iveco-AMT-ը հավաքում է Trakker արտաճանապարհային ծանր բեռնատարներ) դուրս գալու հնարավորությունը, հայտնում է Bloomberg-ը։

Բազմաթիվ արտասահմանյան ընկերություններ որոշել են դադարեցնել իրենց գործունեությունը Ռուսաստանում։ Այդ մասին, մասնավորապես, հայտարարել են ավտոարտադրողները՝ Ford, General Motors, Porsche, Suzuki, Volkswagen, Volvo ընկերությունները, իսկ բեռնատար MAN արտադրողը դադարեցրել է ավտոմեքենաների և բաղադրիչների արտահանումը Ռուսաստան և Բելառուս։ Շքեղ մեքենաներ արտադրող Ferrari-ն և Lamborghini-ն նույնպես որոշել են դադարեցնել ավտոմեքենաների արտահանումը Ռուսաստան։