«Բլինքենը զանգեց, գազը նորոգեցին, Լավրովը զանգեց՝ անջատեցին»․ Հ․ Բադալյան

Քաղաքական մեկնաբան Հակոբ Բադալյանի գրառումը․ «Արցախի տեղեկատվական շտաբը հայտնում է, որ ադրբեջանական կողմը ժամեր առաջ դադարեցրել է Արցախի գազամատակարարումը: Եթե դա այդպես է, ապա ստացվում է, որ Բլինքենի զանգի ուժը մի երկու օ՞ր է: Թե՞ այդուհանդերձ հայկական երևակայությունն է փոքր ինչ վառ:
Թեև, մի բացատրություն հուշեմ: Այսօր Հայաստանի և Ադրբեջանի արտգործնախարարներին զանգահարել է Լավրովը: Արժե ասել՝ Բլինքենը զանգեց, գազը նորոգեցին, Լավրովը զանգեց՝ գազը անջատեցին: Ամեն ինչ կընկնի իր տեղը: Միայն թե կստացվի, որ Լավրովի զանգը Բլինքենից ազդեցի՞կ է:
Թե՞ այդուհանդերձ ժամանակն է, որ մենք դադարենք իրավիճակը լոկ զանգերով չափելուց, որովհետև միջազգային քաղաքականությունն ունի շատ-շատ շերտեր ու հանգամանքներ, որտեղ զանգերը կարող են ղողանջել շատ խաբուսիկ:
Իսկ արցախցիները փաստորեն էս գարնան ցրտին վերստին հայտնվում են «հումանիտար տեռորի» թիրախում»: