«Ադրբեջանն առանց պայթյունների փակել է գազատարի փականը՝ ապացուցելով, որ ինքն է հեղինակել մարտի 7-ի պայթյունը»․ Փաշինյան

Արդեն երեք օր է՝ Արցախի Հանրապետության քաղաքացիները զրկված են բնական գազի մատակարարումից։ Սա տեղի է ունեցել Ադրբեջանի միջամտության արդյունքում։

Այսօր Կառավարության նիստի մեկնարկին վարչապետ Նիկոլ Փաշինյանն անդրադարձավ Արցախում Ադրբեջանի կողմից գազամատակարարման խափանմանը։

«Ինչպես գիտեք, մարտի 7-ին Արցախին մատակարարող գազատարը պայթեցվել էր Արդբեջանի վերահսկողության ներքո գտնվող տարածքում։ Ամենատարբեր պատրվակներով Ադրբեջանը թույլ չէր տալիս գազատարի վերանորոգոմը և, ի վերջո, ինքը նորոգեց»,- նշեց վարչապետը։

«Արդյունքում, մեր տեղեկություններով, գազատարի վրա տեղադրվել է փական, և ահա մարտի 18-ին՝ 11 օր անց, 4 օրով Արցախի գազամատակարարումը վերականգնելուց հետո Ադրբեջանն արդեն մարտի 21-ին, առանց պայթյունների պարզապես փակել է գազատարի փականը՝ այդպիսով ապացուցելով, որ ինքն է հեղինակել մարտի 7-ի պայթյունը»,- ասաց Փաշինյանը։

«Առանձնակի ուշադրության է արժանի այն փաստը, որ գազամատակարարման երկու դադարեցումներն էլ տեղի են ունեցել եղանակային բացառիկ պայմաններում»,- նկատեց նա։