«Խնդրի մասշտաբն ավելի լայն է, քան ռուս-ադրբեջանական տիրույթը»․ Հակոբ Բադալյան

Քաղաքական մեկնաբան Հակոբ Բադալյանի գրառումը. «ՌԴ Պետդումայի պատգամավորը երկու օր առաջ ռուսական պետական պրոպագանդայի եթերում ակնարկում է Բաքվի նավթային ենթակառուցվածքներին հարվածի հնարավորության մասին, եթե Ադրբեջանը համարձակվի «երկրորդ ճակատ» բացել Մոսկվայի դեմ:
Բաքուն վրդովվում է, Կրեմլը ասում է, որ դա հուզական կարծիք էր, որը կապ չունի պաշտոնական դիրքորոշման հետ: Բայց, Բաքու է ժամանում Մեծ Բրիտանիայի զինված ուժերի նախարարը, ընդ որում դա առաջին այցն է Բաքու, և ինչպես ադրբեջանական լրատվամիջոցներն են ասում՝ անսպասելի այցը, ասել կուզի՝ չպլանավորված:
Իհարկե կարող է կապված լինել հազար բանի հետ, բայց հատկանշական է, որ այդ այցին զուգահեռ Ադրբեջանը Դելյագինի հանդեպ հայտարարում է միջազգային հետախուզում, թեև Կրեմլը կարծես թե հանգստացրել էր և ասել, որ այդպիսի արտահայտությունները անընդունելի են և չեն արտահայտում Կրեմլի պաշտոնական տեսակետը: Բաքվի քայլը սակայն վկայում է, որ հայտարարությունը ընդունել են լուրջ, ինչը նշանակում է, որ լուրջ ընդունելու հիմքերը կան ներկայումս ռուս-ադրբեջանական հարաբերության դաշտում: Ըստ երևույթին այդտեղ է նաև բրիտանացի նախարարի անսպասելի այցի պատճառներից մեկը, այսինքն՝ խնդրի մասշտաբը ավելի լայն է, քան ռուս-ադրբեջանական տիրույթը: Այդ համատեքստում, բրիտանացի նախարարի այցի օրակարգում է գուցե նաև վերջին օրերին Արցախի ուղղությամբ Ադրբեջանի քայլերի «ռեվիզիան» կամ «հաշվապահությունը»: