«Մենք մեզ ռուսից ու Ռուսաստանից ինքնուրույն սուբյեկտ չենք ընկալում»․ Նաիրի Բադալյան

Քաղաքագետ Նաիրի Բադալյանը ֆեյսբուքյան իր էջում գրել է. «Հաճախ եմ մտածել, թե ինչու մենք՝ հայերս, որպես ազգ ու պետություն, այդպես էլ մեր սեփական, ուրիշներից տարբերվող հավաքական շահի գիտակցությունը չունեցանք:
Ինչո՞ւ չենք կարողանում պարզագույն բանը հասկանալ, որ Հայությունը, որպես ազգ և Հայաստանը, որպես պետություն, կարող են և պարտավոր են իրենց սեփական շահերն ունենալ ու դրանցով առաջնորդվել:
Ու որ այդ շահերը տարբեր հանգամանքներում կարող են ինչպես համընկնել, այնպես էլ հակադրվել ուրիշ սուբյեկտների՝ այդ թվում նաև Ռուսաստանի շահերին:
Մտածել, մտածել եմ ու հանգել տհաճ եզրակացության, որ մենք … ԻՆՔՆՈՒԹՅԱՆ ԽՆԴԻՐ ունենք:
Մենք մեզ, որպես հայ ազգ ու Հայաստան պետություն, ռուսից ու Ռուսաստանից ինքնուրույն սուբյեկտ չենք ընկալում, հենց դրա համար էլ սեփական շահի զգացողություն չունենք:
Մենք մեզ, որպես ազգ ու Հայաստանը, որպես պետություն, համարում ենք Ռուսաստանի մասնիկը՝ ավելի կոնկրետ՝ նրա «չերնաժոպի խաչիկը»:
Ու այո՛, այո՛, հենց էդ ծաղրելի ու զզվելի կերպարի մեջ էլ մենք ինքներս մեզ տեսնում ենք մեր սեփական Ռուսաստան-տիեզերքի մեջ:
Դրա համար էլ էդ տեսակ «խաչիկը» չի կարող սեփական, Ռուսաստանինից տարբերվող շահեր ու դրանց գիտակցում ու զգացողություն ունենալ:
Այն, ինչ լավ է ռուսի ու Ռուսաստանի համար, լավ է «խաչիկի» համար և ինչ վատ է ռուսի ու Ռուսաստանի համար, վատ է «խաչիկի» համար…
Հա, ու «խաչիկը» միայն Հայաստանում չէ:
«խաչիկն» ամեն տեղ է՝ Սիդնեյից մինչև Բեյրութ, ռուսի կողմից փլատակների վերածված Հալեպից մինչև Ստեփանակերտ, Երևանից մինչ Մոսկվա, Փարիզ ու Լոս Անջելես…
Եկեք սրա մասին խոսենք: Ու սրանից սկսենք»։