«Սա է ձեր դեմքը». Քրիստինե Վարդանյանը լաթի կտորի հետ համեմատեց իշխանությանը

«Շատ լավ իմանալով, որ թուրք-ադրբեջանական տանդեմը կանգ չի առնելու ոչ մի բանի առաջ՝ անկախ նրանից, թե ինչ կզիջեք, դուք խոսում եք խաղաղության դարաշրջանի մասին, որի միակ երաշխիքը թուրքի խոսքն է և որի վերջնարդյունքը լինելու է նոր ցեղասպանությունը»,- այսօր ՝ ԱԺ-Կառավարություն հարցուպատասխանի ժամանակ, դիմելով իշխանությանը, հայտարարեց «Հայաստան» խմբակցության պատգամավոր Քրիստինե Վարդանյանը։

«Այս ամենը հաշվի առնելով՝ ես արցախցիներին պետք է ասեմ՝ սիրելի արցախցիներ, լավ իմացեք, որ սա միայն ձեր հարցը չի, Հայաստանում կան հարյուր հազարավոր արժանապատիվ քաղաքացիներ, ովքեր գիտակցում են, որ սա հայկական հարց է, իսկ ձեզ միայն մի բան պետք է ասեմ՝ հետևելով վերջին իրադարձություններին պարզ է դառնում, որ Հայաստանի անունից հիմա բանակցում է սա։ Դուք սա եք, սա է ձեր դեմքը, սա է ճշմարտությունը, և սրանից փախնել դուք չեք կարող», - հայտարարեց ընդդիմադիր պատգամավորը՝ սպիտակ լաթի կտորը թափահարելով։

Ալեն Սիմոնյանը կարգադրեց անջատել ընդդիմադիր պատգամավորի խոսափողը։