«Նորմալ հետախուզական ծառայություն չունենք, նորմալ աշխատող դեսպանատներ չունենք». քաղաքագետ

Քաղաքագետ Տիգրան Գրիգորյանը ֆեյսբուքյան իր էջում գրել է. «Եթե դուք կարծում եք, թե Փաշինյանի այս վերջին ելույթները ու դրանց ընթացքում հնչեցված թեզերը հիմնված են ինչ-որ համապարփակ վերլուծությունների վրա, ապա սխալվում եք: Հայաստանի պետական համակարգը այս պահին նմանատիպ համապարփակ վերլուծություններ անելու կարողություններ չունի: Ոչ թե այն պատճառով, որ նմանատիպ վերլուծություններ անելու ընդունակ մարդկային ռեսուրս չունենք, այլ որովհետև ինֆորմացիա չունենք: Նորմալ հետախուզական ծառայություն չունենք, նորմալ աշխատող դեսպանատներ չունենք, իսկ այն մեսիջները, որոնք ուղարկվում են երկրի ղեկավարին օտարերկյա գործընկերների կողմից, շատ հաճախ, ինչպես Լևոն Տեր-Պետրոսյանն էր իրավացիորեն նշում, պարզապես չեն հասկացվում իշխող էլիտայի կողմից:
Ինֆորմացիայի բացակայության պարագայում բոլոր քննարկումները վերածվում են բեսեդկայում սուրճի բաժակ նայելու արարողության: Շատ հաճախ սուրճի բաժակ նայելը համեմված է լինում հին ու բարի դավադրապաշտությամբ: Սուրճի բաժակ նայելու արարողություններ առկա են նաև ամենաբարձր մակարդակով տեղի ունեցող քննարկումներում:
Այս խնդիրը լուծելու ուղղությամբ որևէ քայլ չի ձեռնարկվում: Օրինակ, մեզ համար ամենակարևոր ուղղություններից մեկում՝ Մոսկվայում, մինչ այսօր նորմալ աշխատող դեսպանատուն չունենք, որը կկարողանար առնվազն շփվել որոշում կայացնողների ու քաղաքականություն մշակողների հետ ու ինֆորմացիա փոխանցել Երևան: Ռուսաստանում նոր նշանակված դեսպանին այս խնդրի մարմնավորումը կարելի է համարել»: