«Ինչքան ցածր դնես նշաձողը՝ փորձելու են ստուգել՝ իսկ ավելի ցածր հնարավոր չի՞». Միքայել Նահապետյան

«Քաղաքացու որոշում» ՍԴԿ անդամ Միքայել Նահապետյանի գրառումը. «Վերջին օրերին մի կարևոր տեղեկատվական հակասություն ծագեց: Բանն այն է, որ մի կողմից լրիվ արժանահավատ պնդում արվեց, որ «միջազգային հանրությունը մեզ առաջարկել և առաջարկում է իջեցնել Արցախի կարգավիճակի նշաձողը», իսկ մյուս կողմից կա Ալիևի հրապարակային ոչ պակաս արժանահավատ հայտարարությունը, որ «միջազգային հանրությունը փակ դռների հետևում ստիպում է ճանաչել Արցախի անկախությունը»:
Հիմա էս հակասության մեջ «տանքպրծնենքները» պնդում են, որ Ալիևի ասածը իրականության հետ կապ չունի, ներքին լսարանի համար է... մի խոսքով ասում են, որ միջազգային հանրությունը եղան-տապոռն առած մեզ է հալածում: Իսկ նախկին երկու բնակցողների կողմնակիցները ասում են «Մեր ժամանակ Ալիևին էին ճնշում, հիմա՝ ձեզ»՝ ըստ էության էդ եղան-տապոռը ներկայացնելով հատուկ Ալիևի համար սրած գործիքներ:
Առաջին անգամ չի, որ էս մարդիկ իրականության լրիվ հակադիր պատումներ ունեն: Բայց էս մի դրվագը չափազանց կարևոր է, որովհետև ճշմարտության ըմբռնումը կբացահայտի բանակցային գործընթացի էությունն ու փիլիսոփայությունը:
Իսկ ճշմարտությունն այն է, որ էս երկու փաստերի մեջ ոչ մի հակադրություն չկա՝ միջազգային հանրությունը ճիշտ նույն պահին և՛ ճնշել է Հայաստանին, որ հրաժարվի անկախության կարգավիճակի պահանջից, և՛ ճնշել է Ադրբեջանին, որ ընդառաջ գա անկախության կարգավիճակին: Բա ձեր կարծիքով միջնորդները Վարդան Պետրոսյանի հայտնի ներկայացման «Արսենչիկն» է՞, որ դես ու դեն վազի «Ռոզա տոտան ասում ա...», «Կոլյա ձաձան ասում ա...» պարզ սուրհանդակի տեքստերով:
Ու էս նրբության ըմբռնումը պիտի թույլ տա հասկանալ, որ անկախ նրանից, թե որտեղ կլինեն մեր ու Ադրբեջանի նշաձողերը՝ միջնորդները միշտ սեղմելու են էդ նշափողերին՝ փորձելով դեսուդեն տանել: Ու ինչքան ցածր դնես նշաձողը՝ փորձելու են ստուգել իսկ ավելի ցածր հնարավոր չի՞»: