«Հայաստանի և Ադրբեջանի բանակցությունները հիմա նման են կույրի և խուլի զրույցին»․ Ոսկան Սարգսյան

Լրագրող Ոսկան Սարգսյանի գրառումը. «Սոթքում կրակոցներով խոցվեց «խաղաղության դարաշրջանի բացումը»
Ադրբեջանի ՊՆ-ն իրեն հատուկ ցինիզմով հերքեց ադրբեջանական զինուժի կողմից գնդակոծությունը, Սոթքի հանքավայրում հայ հորատողի վիրավորվելը։ Այդ կրակոցներով գնդակահարվեց Նիկոլ Փաշինյանի կողմից տարածաշրջանում «խաղաղության դարաշրջանի բացումը»։

Հին Հռոմում ասում էին՝ վա՛յ պարտվողին, կապիտուլյացիա ստորագրած Նիկոլ Փաշինյանը, ըստ տրամաբանության, պետք է հեռանար, որպեսզի Հայաստանի նոր իշխանությունը հնարավորություն ունենար ավելի բարվոք դիրքերից բանակցել Ադրբեջանի հետ։ Սակայն նա ինքնակամ չի հեռանալու, իսկ Հայաստանի և Ադրբեջանի բանակցությունները հիմա նման են կույրի և խուլի զրույցին։ Բռնապետ Ալիևի քարոզչամեքենան պնդում է, որ Հայաստանի անվտանգության խորհրդի քարտուղար Արմեն Գրիգորյանի և Ադրբեջանի նախագահի օգնական Հիքմեթ Հաջիևի միջև համաձայնություն է կայացել, որ ՅՈՒՆԵՍԿՕ-ի պատվիրակները Հայաստան են այցելելու, որպեսզի ստուգեն ադրբեջանական մշակույթի և պատմության հուշարձանների վիճակը։ Ինչպես ասում են՝ Աստված մեզ բեթարից ազատի։