Հայտնի է՝ որքան գումար կբռնագանձի դատարանը Արման Բաբաջանյանից՝ հօգուտ Արթուր Վանեցյանի

Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանի գրառումը․ «Երևանի ընդհանուր իրավասության դատարանը՝ դատավոր Նաիրա Ավետիսյանի նախագահությամբ, պարտավորեցրել է ԱԺ նախկին պատգամավոր Արման Բաբաջանյանին՝ հերքել «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանի վերաբերյալ տարածած զրպարտություն հանդիսացող տվյալները և ներողություն խնդրել:

Բաբաջանյանը զրպարտելով Արթուր Վանեցյանին համարել էր անհայրենիք՝ պնդելով, թե «Դոսյեում» նշված «Կանդիդատ» անունով անձը Վանեցյանն է; «Պիտի ասեմ, որ այսօր ամբողջ խաղադրույքը նրա վրա է դրված»,-հայտարարել էր Բաբաջանյանը՝ ավելացնելով, թե նա «վաճառվել» է ամբողջությամբ ռուսական հատուկ ծառայությունների այն շրջանակին, ովքեր կարող են այս կամ այն կերպ հետաքրքրություն ունենալ Հայաստանում փոփոխությունների հետ»:
Դատաքննության արդյունքում դատարանը գտել է, որ Արման Բաբաջանյանը զրպարտել է Վանեցյանին և պարտավորեցրել է ներողություն խնդրել Արթուր Վանեցյանից՝ սահմանելով ներողություն խնդրելու հետևյալ ձևը.

«Ես՝ Արման Բաբաջանյանս, ներողություն եմ խնդրում Արթուր Վանեցյանից, վերջինիս հասցեին www.factor.am կայքով բանավոր խոսքի միջոցով հրապարակայնորեն հերքել նույն կայքում 18.09.2020թվականին հրապարակված «Վանեցյանն է «Դոսյեի» Կանդիդատ անունով անձը․ նա վաճառված է ռուսական հատուկ ծառայություններին․ Արման Բաբաջանյան» վերտառությամբ տեսանյութում նրա վերաբերյալ հնչեցված «անհայրենիք» վիրավորական արտահայտության համար»:

Միաժամանակ դատարանը որոշել է Արման Բաբաջանյանից հօգուտ Արթուր Վանեցյանի բռնագանձել 500․000 ՀՀ դրամ՝ որպես զրպարտության և 300․000 ՀՀ դրամ՝ որպես վիրավորանքի համար փոխհատուցման գումար, 300.000 ՀՀ դրամ՝ որպես դատական ծախս՝ փաստաբանի խելամիտ վարձատրության գումար և 24.000 ՀՀ դրամ՝ պետական տուրքի գումար»: