Մանրամասներ՝ Երևանում մեկ մարդու կյանք խլած պայթյունից

«Վելլար Գրուպ» ՍՊԸ-ի տարածքում հունիսի 18-ին տեղի ունեցած պայթյունի դեպքով, որը մեկ մարդու կյանք էր խլել, քրգործ է հարուցվել, տեղեկությունը հայտնում է ՀՀ քննչական կոմիտեն։
Հայտնել էինք, որ Երևանի Արին Բերդի թիվ 3/6 հասցեում տեղի է ունեցել պայթյուն, որի հետևանքով մեկ մարդ մահացել է, ևս մեկն էլ վնասվածքներ ստացել։
«Նախնական տվյալներով՝ հունիսի 18-ին՝ ժամը 11:00-ի սահմաններում, Արին-Բերդ փողոցում մետաղաձուլմամբ զբաղվող ՍՊ ընկերության աշխատակցի կողմից գազային և թթվածնային բալոնների գործադրմամբ աշխատող գազակտրող սարքի միջոցով մետաղական դետալի կտրման աշխատանքներ կատարելու ընթացքում տեղի է ունեցել պայթյուն: Տարբեր մարմնական վնասվածքներից հիշյալ աշխատակիցը մահացել է, իսկ նույն տարածքում գտնվող մեկ այլ աշխատակից ստացել է մարմնական վնասվածքներ և տեղափոխվել «Էրեբունի» ԲԿ»,–գրված է հաղորդագրության մեջ։
Փաստի առթիվ ՀՀ քրեական օրենսգրքի 157-րդ հոդվածի 2-րդ մասով (աշխատանքի պաշտպանության կանոնները խախտելը) հարուցվել է քրեական գործ:
Տեղեկություններ են ստացվել, որ աշխատակցի մահվան պատճառ կարող է հանդիսանալ գազակտրող սարքի միջոցով նշված խողովակը կտրելու ընթացքում առաջացած պայթյունը:
Նշանակվել է դատապայթյունատեխնիկական, դատահետքաբանական և դատաբժշկական փորձաքննություն, հարցաքննվել են մի շարք անձինք:
Նախաքննությունը շարունակվում է: