«Բաքուն հասկացնել է տալիս, որ թույլ չի տալու սահմանադրական փոփոխությունների անցկացում Արցախում». Վարդան Բալյան

Քաղաքական վերլուծաբան Վարդան Բալյանը ֆեյսբուքյան իր էջում գրում է. «Ադրբեջանական տեղեկատվական դաշտում քննարկում են սույն թվականի դեկտեմբերի 10-ին Արցախում նախանշված սահմանադրական հանրաքվեի թեման: Հաղորդվում է, որ սահմանադրական փոփոխություններով նախատեսվում է նախագահական և խորհրդարանական ընտրությունների առանձնացում, այսինքն՝ անցում կիսանախագահական կառավարման համակարգի, որտեղ նախագահը կունենա առաջնային մանդատ: Խոսվում է գործող նախագահի հրաժարականի և խորհրդարանի լուծարման մասին: Մինչև նոր խորհրդարանական և նախագահական ընտրություններ, ըստ որում, կառավարումն իրականացնելու է խորհրդարանի կողմից ընտրված նախագահը: Բնականաբար, Ադրբեջանն անօրինական է համարում սահմանադրական փոփոխությունների և նոր ընտրությունների անցկացումը:

Պաշտոնական Բաքուն բաց տեքստով հասկացնել է տալիս, որ, ըստ ամենայնի, հակադրվելու է և հնարավոր բոլոր՝ ընդհուպ ռազմական միջոցներով թույլ չի տալու սահմանադրական փոփոխությունների և ընտրությունների անցկացում Արցախում՝ դիտարկելով այն որպես անջատողականության և վերջին պատերազմի արդյունքների վերանայման փորձ: Հավելեմ, որ մայիս ամսից ադրբեջանական տեղեկատվական տիրույթում դիտարկում ենք 3-րդ Արցախյան պատերազմի հավանականության մասին փորձագիտական-հանրային քննարկումների անընդհատ աճ»: