«Ե՞րբ է գալու պատասխանատվության պահը». Սուրեն Սուրենյանց

Քաղաքագետ Սուրեն Սուրենյանցի գրառումը․ «Ե՞րբ է գալու Նիկոլ Փաշինյանի, նաև Ռոբերտ Քոչարյանի ու Սերժ Սարգսյանի պատասխանատվության պահը

ՊԲ նախկին հրամանատար Միքայել Արզումանյանին մեղադրանք է առաջադրվել զինվորական պաշտոնեական անփութության համար, ինչի հետևանքով տեղի է ունեցել Շուշիի անկումը:

Պատերազմի հետ անուղղակի կապ ունեցող հոդվածով կալանքի տակ է նաև Հայաստանի ՊՆ նախկին նախարար Դավիթ Տոնոյանը:

Երբ պետությունը պատերազմում պարտվում է, մեղքի ու պատասխանատվության իրենց բաժինն ունեն նաև բարձրաստիճան զինվորականներն ու ամենևին չեմ բացառում, որ տարբեր գեներալների հաշվին ավելանա «էլիտար» կալանավորների թիվը:

Չեմ էլ կարող պնդել կամ հերքել նրանց մեղավորությունը, որովհետև դա նախաքննության ու դատաքննության գործն է, որոնց ընթացքը, անշուշտ, պետք է գտնվի բոլորիս համակ ուշադրության կենտրոնում:

Բայց մի քանի նկատառում, քաղաքական գնահատական, այնուամենայնիվ, ուզում եմ հնչեցնել: Պատերազմի հետ կապված քրեական գործերը, անկախ հիմքերի առկայությունից, որոշակի անվստահություն հարուցում են հասարակության մեջ, որովհետև քաղաքական իշխանությունն առաջնորդվում է մի վարկածով, ըստ որի՝ պարտության հարցում մեղավոր են բոլոր արտաքին ու քաղաքական սուբյեկտները՝ իրենից բացի:

Արդյո՞ք հարուցված գործերը դառնալու են քաղաքական այս նարատիվի, մտածողության պատանդը, թե՞ օբյեկտիվ, համապարփակ քննություն է տեղի ունենալու՝ ցույց կտա ժամանակը: Եվ վերջապես: Ուժերի հարաբերակցությունը, դիվանագիտական միջավայրը, ըստ էության, կանխորոշել էին 44-օրյա պատերազմի արդյունքը:

Հայաստանը չէր կարող հաղթել պատերազմում, ըստ այդմ՝ առաջին հերթին, պետք է պատասխանատվության ենթարկվեն արժանապատիվ խաղաղության օրակարգը վիժեցրած, ձախորդ դիվանագիտությամբ պատերազմն անխուսափելի դարձրած քաղաքական առաջնորդները:

Ե՞րբ է գալու Նիկոլ Փաշինյանի, նաև Ռոբերտ Քոչարյանի ու Սերժ Սարգսյանի պատասխանատվության պահը:

Առանց դրա՝ գուցե իսկապես մեղավոր գեներալները լինելու են քավության նոխազի կարգավիճակում»: