«Միջազգային խոշոր դերակատարներն իմացել են Ադրբեջանի հերթական ագրեսիայի օրն ու ժամը, բայց մատը մատին չեն խփել». Ա. Այվազյան

Մատենադարանի ավագ գիտաշխատող Արմեն Այվազյանի գրառումը․ «Պարզից էլ պարզ է, որ այս պահին միջազգային խոշոր դերակատարներն Ադրբեջանին սաստելու որևէ ցանկություն չունեն։ Նրանք շատ լավ էլ իմացել են Ադրբեջանի հերթական ագրեսիայի օրն ու ժամը, բայց մատը մատին չեն խփել այն կանխելու համար։ ԱԴՐԲԵՋԱՆԻՆ ԿԱՐՈՂ Է ԿԱՆԳՆԵՑՆԵԼ ՀԱՅԱՍՏԱՆԻ ԱՆՀԱՄԱՉԱՓ ՀԶՈՐ ՀԱԿԱՀԱՐՎԱԾԸ։ ՄԻՄԻԱՅՆ։
Բայց տեղի է ունենում ճիշտ հակառակը. հրետակոծվում են մեր սահմանամերձ քաղաքներն ու գյուղերը, իսկ հայկական կողմը չի համարձակվում հարվածել ադրբեջանական սահմանամերձ քաղաքներին ու գյուղերին։ Այս պարտվողական մարտավարությունը մեծապես քաջալերում է թշնամուն։ Կրավորական պաշտպանությունը բերելու է շարունակական պարտությունների։ Դիմադրությունը պետք է լինի ակտիվ, հակահարձակողական, որպեսզի նաև թույլ չտա մեզանում բարոյական ուժերի անդառնալի անկում։
Գտնել և որոշել է պետք հայկական անհամաչափ հակահարվածի ձևերն ու հնարավորությունները։ Իհարկե, դա կարելի կլինի անել Նիկոլից, նիկոլիզմից ու նիկոլական կեղծ-խաղաղության «օրակարգերից» ամբողջությամբ ձերբազատվելուց հետո միայն»։