«Մենք դեմ չենք, որ Հայաստանն ու Ադրբեջանը հարաբերությունները բարելավեն»․ Դավիթ Բաբայան

Արցախի արտաքին գործերի նախարար Դավիթ Բաբայանը լրագրողների հետ զրույցում խոսել է Արցախի պատվիրակության Երևան ժամանման արդյունքների մասին․ «Պատվիրակության ներգրավմամբ սա արդեն երկրորդ հանդիպումն է։ Այս օրերին տարբեր հանդիպումներ ենք ունենում, բնական է՝ ամենակարևոր հանդիպումները տեղի են ունենում ՀՀ բարձրագույն իշխանության հետ։ Երեկ հանդիպել էինք ԱԽ քարտուղարի հետ, այսօր՝ ԱԺ նախագահի, նախատեսված է հանդիպում նաև ՀՀ նախագահի հետ, վաղը կհանդիպենք արտգործնախարարի և վարչապետի հետ։ Քննարկում ենք ամենաազնիվ ձևով ամենաբարդ հարցերը»։

Բաբայանը Ադրբեջանի և Հայաստանի միմյանց տարածքային ամբողջականությունները ճանաչելու մասով նշել է․ «Մենք անկեղծ ենք, քաղաքական մանիպուլյացիաներից հեռու, որովհետև ազգի ճակատագիրն է որոշվում․ մենք դեմ չենք, որպեսզի Հայաստանն ու Ադրբեջանը հարաբերությունները բարելավեն, սակայն պետք է հասկանանք, որ Արցախի համար և ողջ հայության համար անընդունելի է Արցախը ճանաչել Ադրբեջանի մաս։ Ցանկացած փորձ Արցախը Ադրբեջանի կազմում խցկելու՝ բերելու է երկու տարբերակի․ կա՛մ պատերազմի, արյունահեղության, ցեղասպանության, կա՛մ՝ Արցախի հայաթափման»։