«Մենք գործ ունենք կալանքի այնպիսի նպատակի հետ, որն օրենսդրությամբ առհասարակ նախատեսված չէ»․ Ժիրայր Ղարագյոզյան

Այսօր՝ հոկտեմբերի 24-ին, «Էրիկ Ալեքսանյանի կալանավորումն ու փաստաբանական գործունեությանը սպառնացող վտանգները» թեմայով ասուլիսի ընթացքում փաստաբան Աննա Ծառուկյանը հայտնել է, որ իրենք այստեղ են՝ դատապարտելու կալանավորումը փաստաբանի նկատմամբ, որը, մեղմ ասած, խոչընդոտում է բոլոր փաստաբանների գործունեությունը․ «Ի՞նչն է խնդիրը. փաստաբանին, որը զբաղվում է բազմաթիվ հնչեղ գործերով, իշխանությունները, պետությունը հետապնդում են՝ կալանավորելով նրան մի պարագայում, երբ վերջինն ունի բազմաթիվ գործերի շրջանակներում հաղթանակներ։ Բիրտ ձևով անձին հենց դատարանի դիմացից ձերբակալումը մեր հեղինակության հետ է խաղում»։

Փաստաբանների պալատի անդամ, փաստաբան Ժիրայր Ղարագյոզյանն էլ նշել է, որ անձի նկատմամբ ամենախիստ, բացառիկ խափանման միջոցը կիրառելի է այն դեպքում, երբ առկա է քրեական դատավարությամբ նախատեսված երեք հիմքերից որևէ մեկը․ «Դրանք են, օրինակ, երբ անձին մեկուսացնում են հասարակությունից, որպեսզի կանխեն նրա փախուստը, կա՛մ նրա կողմից հնարավոր ապօրինի միջամտությունը ապացուցման գործընթացին, կա՛մ որպեսզի նա չկատարի օրենքով արգելված նոր արարք։ Առավել քան ակնհայտ է, որ այս հիմքերից որևէ մեկը գոյություն ունենալ չի կարող օբյեկտիվ իրականության մեջ, մենք գործ ունենք կալանքի այնպիսի նպատակի հետ, որը օրենսդրությամբ առհասարակ նախատեսված չէ»։