«Չեմ տեսել, որ Կրեմլը միջանցքի հարց առաջ քաշի»․ Սեյրան Օհանյան

ԱԺ «Հայաստան» խմբակցության պատգամավոր Սեյրան Օհանյանը լրագրողների հետ զրույցում անդրադառնալով Հայաստանում հակառուսական տրամադրությունների տարածմանը, ասել է. «Չենք կարող մեր աշխարհագրական դիրքից պոկվել ու այլ տեղ գնալ ապրելու: ՀԱՊԿ-ի ոչ մի երկիր չի գալու մեզ համար խրամատ փորի ու մեր սահմանները պաշտպանի։ Եթե դու ռազմական դրություն չես հայտարարել, գոռգոռում ես, ասում ես՝ եկեք ինձ պաշտպանեք: Նորմալ մարդը ինքն է իրեն պաշտպանում»:

Պատասխանելով լրագրողի դիտարկմանը, ըստ որի՝ Կրեմլը առաջ է քաշում միջանցքի հարցը, Օհանյանը նշել է․ «Չեմ տեսել, որ Կրեմլը միջանցքի հարց առաջ քաշի, ընդհակառակը՝ մենք տեսնում ենք, որ նետել երկիրը այս կամ այն թևերի շփման հատված, այդ ամենն է թույլ տալիս, որ ՀՀ-ի վրա ճնշումները շարունակվեն. մենք տեսնում ենք, որ Արևմուտքից մեզ տրամադրված բանաձևը տանում է Արցախի վերջնական կորստի»։

Օհանյանը նաև տեղեկացրեց, որ ընդդիմության գործողությունների մեջ նորություններ կլինեն: