«Ըստ իրանական մամուլի՝ Քաջարանի թունելի կառուցման աշխատանքները կսկսվեն գալիք տարվա գարնանը»․ Արտյոմ Երկանյան

Լրագրող, հեռուստամեկնաբան Արտյոմ Երկանյանը «Շանթ» հեռուստաընկերության եթերում անդրադարձել է ՀՀ տարածքային կառավարման և ենթակառուցվածքների նախարար Գնել Սանոսյանի և Իրանի ճանապարհների և քաղաքաշինության նախարար Ռոստամ Ղասեմիի հանդիպմանը, որի ժամանակ քննարկվել է Քաջարանի թունելի կառուցման հարցը․ «ՀՀ պաշտոնական աղբյուրները որևէ հստակ տեղեկություն այս հարցի վերաբերյալ չեն տարածում, բայց իրանական «ԻՌՆԱ» պետական լրատվական գործակալությունը պաշտոնապես հաստատում է տեղեկությունն այն մասին, որ ձեռք է բերվել համաձայնություն Քաջարանի կամուրջը կառուցելու մասին, և հստակ ժամկետ է հիշատակվում, որ շինարարական աշխատանքները կսկսվեն գալիք տարվա գարնանը: Ըստ Թեհրանի մամուլի՝ հավանաբար հենց իրանական ընկերություններն են կառուցելու այդ թունելը: Թունելը զգալիորեն կհեշտացնի Իրանից ՀՀ բեռնափոխադրումները, այն 7.2 կմ երկարություն կունենա, և կառուցվելու է Մեղրիի ոլորանների հատվածում: 12 կմ-ով կկարճացնի ճանապարհը և ամենակարևորը՝ այն շրջանցելու է վտանգավոր հատվածը, որը ձմռանը հաճախ փակվում է ձնաբքերի պատճառով»,-մանրամասնել է Երկանյանը։

Երկանյանը նաև ավելացրել է․ «Այդ թունելը կառուցելու որոշումը կայացվել էր դեռևս 2000 թվականին։ 20 տարի անց միայն կմեկնարկեն այդ աշխատանքները, այն էլ դեռ պետք է համոզվենք, որ իսկապես մեկնարկելու են»։