«Արցախցին ոչ թե ընդունում է խնդրի լուծման ռուսական տարբերակը և մերժում արևմտյանը, այլ պարզապես առաջ է տանում իր տեսլականը»․ Կարեն Միրզոյան

Արցախի նախկին արտգործնախարար Կարեն Միրզոյանը 168 TV-ի եթերում խոսել է ՀՀ ներկայիս իշխանությունների վարած քաղաքականության մասին․ «ՀՀ իշխանությունների կողմից արվում են հակասական հայտարարություններ, որոնք հնչեցվում են ընդամենը օրվա զարգացումներին ի պատասխան. հայտարարություններն արվում են՝ հիմքում չդնելով որևէ երկարաժամկետ զարգացում, և այս իշխանության վարած արտաքին և ներքին քաղաքականությունը հենց այդպիսին է։ Չեմ կարծում, որ այն տեսակետը, որն Արցախի հարցում արտահայտում է այս իշխանությունը, արտահայտում է ամբողջ հայ ժողովրդի կարծիքը»։

Միրզոյանը նաև նկատել է․ «Արցախցին այսօր ոչ թե ընդունում է իր խնդրի լուծման ռուսական տարբերակը և մերժում արևմտյանը, այլ պարզապես առաջ է տանում իր տեսլականը՝ ապրել Ադրբեջանի կազմից դուրս: Ուստի վտանգավոր է այն հարցադրումը, թե Արցախի հարցի կարգավորման հարցում առաջարկվող տարբերակներից ո՞րը պետք է ընտրել։ Այդ հարցադրումը Արցախի խնդիրը տեղափոխում է մեծ տերությունների մրցակցության դաշտ, ինչը կարող է մեզ համար ունենալ վտանգավոր հետևանքներ։ Պետք է հիշել, որ խոսքը նրա մասին է, որ արցախցին չի ցանկանում զիջել իր այն նվաճումները, որոնք ձեռք է բերել իր զավակների արյան գնով, և որոնք հիմա իր ձեռքից փորձում են տանել բռնի ուժով»։