«Բավականին կեղտոտ արշավներ սկսվեցին իմ դեմ»․ Արտակ Բեգլարյան

Այսօր՝ նոյեմբերի 3-ին, Արտակ Բեգլարյանը պետական նախարարի պաշտոնում իր գործունեությունն ամփոփող ասուլիսի ընթացքում անդրադարձել է լուրերին, թե ինքը պատրաստվում է Արցախի նախագահական ընտրություններին մասնակցել․ «Սպեկուլյացիա եղավ մեկ լրատվամիջոցի կողմից, և դա ներկայացրին որպես նախագահական ընտրությունների վերաբերյալ պատասխան, այնինչ շատ հստակ պատասխանել եմ խորհրդարանական ընտրությունների մասով։ Բավականին կեղտոտ արշավներ սկսվեցին իմ դեմ, տարբեր բամբասանքներ և այլն։ Որևէ մեկին ես ինձ չեմ համարում հակառակորդ, մրցակից, բոլորն իմ գործընկերներն են, նույնիսկ նրանք, ովքեր իմ հանդեպ կեղտոտ արշավներ են սկսել, իմ անունը վարկաբեկել, որովհետև այս իրավիճակում մեզ պետք է միասնականություն»։

Բեգլարյանը չնշեց, թե ովքե՞ր են այդ մարդիկ, ո՞ր ուժերն են․ «Ում պետք է, ես իրենց ներկայացրել եմ կամ ներկայացնելու եմ առաջիկայում, որովհետև ես միշտ սիրում եմ ազնիվ հարաբերություններ։ Այո՛, ունեմ կասկածներ, չեմ կարող ոմանց պարագայում հիմնավորված ասել, բայց ինձ համար ակնհայտ է, որ այդ արշավները մեկնարկել են իմ այդ հայտարարության մանիպուլյացիայից հետո»։