««Զանգեզուրի միջանցքի» գործարկումը Ռուսաստանի համար միակ հնարավորությունն է». Արա Պապյան

ԱԺԲ անդամ, դիվանագետ Արա Պապյանի գրառումը. «Հասկանալու համար՝ ի՞նչ է կատարվում Արցախի շուրջ, պետք է ավելի լայն ընդգրկումով նայել երևույթներին։ Ս․ թ․ դեկտեմբերի 5-ին ուժի մեջ մտավ Ռուսաստանի դեմ պատժամիջոցների հերթական փաթեթը։ Այն ոչ միայն ռուսական նավթի առավելագույն շեմը սահմանեց մեկ տակառի դիմաց 60$, այլև, որ ավելի կարևոր է, արգելք դրեց այդ նավթի ծովային ճանապարհով արտահանման վրա։ Հաշվի առնելով, որ 2023թ․ մարտի 5-ից նման արգելք դրվելու է նաև նավթամթերքների վրա, իսկ սրանց համախառն արտահանումն ու ածանցյալները միասին կազմում են ՌԴ բյուջեի կեսից ավելին, նշանակում է ռուսական տնտեսությանը և բանակին առաջիկա 7-8 ամիս հետո սպասվում է կատարյալ փլուզում։

Այս իրավիճակում Ռուսաստանի համար ցամաքային արտահանումները ձեռք են բերում կենսական նշանակություն և «Զանգեզուրի միջանցքի» գործարկումը Ռուսաստանի համար, ըստ էության, դրա միակ հնարավորությունն է, քանի որ դեպի Չինաստան արտահանումը հասել է իր առավելագույնին։ Մնացածը, ինչպես ասում են, տեխնիկայի հարց է։ Թուրքերի հետ համաձայնեցված ու նրանց ձեռքով փակում ես Լաչինի միջանցքն ու բացելու դիմաց Հայաստանից կորզում ինչ-որ անցուղի Սյունիքով, որը միջանցք չես անվանում։

Շահում է Ռուսաստանը, շահում են ՀՀ իշխանությունները, շահում են ազեր-թուրքերը։ Միակ կորցնողն Արևմուտք է։ Ահա թե ինչու Արևմուտքը պահանջում է Լաչինի միջանցքի բացում ԱՌԱՆՑ ՆԱԽԱՊԱՅՄԱՆՆԵՐԻ։

Դե այս աղմուկի մեջ էլ ոմանք մի քանի մանր հարցեր են լուծում։ Օրինակ՝ ազեր-թուրքերն Արցախին պարտադրում են գազը գնել իրենցից»։