«Ճանապարհի փակումը համաձայնեցված է Թուրքիայի հետ. որպես գործիք օգտագործվում է Ադրբեջանը». Ռուբեն Սաֆրաստյան

Արևելագետ Ռուբեն Սաֆրաստյանը Factor TV-ին տված հարցազրույցում՝ խոսելով Ադրբեջանի կողմից Լաչինի միջանցքի փակման մասին՝ կարծիք է հայտնել, որ իր խոսքով՝ բացահայտ ցեղասպանական բնույթ ունեցող այս գործողությունը համաձայնեցված է Թուրքիայի հետ. «Ես կասեի՝ համատեղ ծրագրի մաս է կազմում: Թուրքիան նպատակ է հետապնդում Հարավային Կովկասում հնարավորինս թուլացնել Ռուսաստանին և ուժեղացնել իր դիրքերը և որպես գործիք օգտագործվում է Ադրբեջանը»:

Սաֆրաստյանը համոզված է, որ դեռ որոշ ժամանակ կշարունակվի Լաչինի շրջափակումը։ Ըստ նրա՝ խնդրի կարգավորման համար առաջին հերթին անհրաժեշտ են միջազգային կազմակերպությունների ավելի նպատակաուղղված գործողություններ՝ ճնշում գործադրել Ադրբեջանի, Թուրքիայի վրա։

«Երկրորդ՝ ես դեռ հույսս չեմ կորցրել, որ Ռուսաստանը որոշակի քայլերի կդիմի, որովհետև կարող է Ադրբեջանի վրա ազդել, եթե ցանկանա։ Թուրքիայի վրա կարող է ճնշում գործադրել նաև ԱՄՆ-ն՝ դիվանագիտական, տնտեսական առումով»,- շարունակելով խոսքը՝ ընդգծել է նա: