«Կա´մ ամեն ինչ անում եք Հայաստանի և Արցախի համար, կա´մ հրաժարական տվեք». Արմեն Խաչատրյան

ՀԱԿ վարչության անդամ Արմեն Խաչատրյանը 24TV-ի եթերում խոսելով Լաչինի միջանցքի փակման հարցը կարգավորելու ուղղությամբ ՀՀ ներկայիս իշխանությունների դերակատարությունից՝ կարծիք է հայտնել, որ 120 հազար հայերի անվտանգությունից հրաժարվելը այս իշխանությանը դարձրել է սուբյեկտ, որին կարելի է ամեն ինչ ասել՝ հանցագործ, դավաճան, անպատասխանատու, արկածախնդիր, ազգակործան, պատուհաս. «1990-ականների ամենածանր պահերին անգամ, երբ ռազմական թեժ գործողությունների արդյունքում արդեն Ստեփանակերտն էր վտանգված, Արցախի մի մասն էր օկուպացված ադրբեջանիցների կողմից, ՀՀ քաղաքներն ու գյուղերն էին ռմբահարվում, այդ թվում՝ Կապանի, Գորիսի ուղղությամբ, բայց չի եղել որևէ վայրկյան, երբ ՀՀ իշխանությունները կասկածի տակ դնեն այն հանգամանքը, որ ՀՀ-ն հանդիսանում է Արցախի ժողովրդի անվտանգության երաշխավորը»:

Անդրադառնալով ՀՀ Պաշտպանության նախկին փոխնախարար, այժմ՝ ՔՊ-ական պատգամավոր Գագիկ Մելքոնյանի հայտարարությանը, ըստ որի՝ «Արցախը կորցնես լավա՞, թե՞ Հայաստանը», Խաչատրյանն ասել է. «Կա´մ երկուսը, կա´մ հրաժարական տվեք, կա´մ ամեն ինչ անում եք և´ Հայաստանի, և´ Արցախի համար, կա´մ հրաժարական տվեք»: