«Նշաձող իջեցնելու մասին խոսող վարչապետն ասում էր՝ Արցախի ժողովրդի ինքնորոշման իրավունքը սրբազան է». Վարդան Պողոսյան

«Հայաստան» խմբակցության նախաձեռնությամբ այսօր ԱԺ նիստերի դահլիճում անցկացվում են խորհրդարանական լսումներ՝ Ադրբեջանի կողմից Լաչինի միջանցքը փակելու թեմայով:

Սահմանադրագետ Վարդան Պողոսյանն իր ելույթում անդրադարձել է ՀՀ վարչապետ Փաշինյանի՝ 2022-ի ապրիլի 13-ին արված հայտարարությանը, ըստ որի՝ «միջազգային հանրությունը ՀՀ և Արցախի շուրջ կոնսոլիդացիա կապահովի, եթե Երևանն իջեցնի ԼՂ կարգավիճակի հարցում իր նշաձողը»: «Նույն վարչապետը 2021-ի սեպտեմբերի 2-ին հայտարարել էր, որ Արցախի ժողովրդի ինքնորոշման իրավունքը սրբազան է: Այսինքն՝ մոռանում ենք ինքնորոշում, ԼՂՀ հասկացությունները և խոսում ենք միայն ԼՂ բնակիչների իրավունքների և անվտանգության ապահովման մասին, կարգավիճակի մասին այլևս որևէ խոսք չկա: Արդյո՞ք ՀՀ այսօրվա իշխանություններն իրավունք ունեն նման ձևով մոտենալ Արցախի հիմնահարցին. ո՛չ, չունեն, դա առաջին հերթին հակասահմանադրական է»,- ընդգծել է Պողոսյանը: