«Եթե քաղաքացին չունի արտարժութային եկամուտներ, պետք է վերցնի դրամային հիփոթեքային վարկ». Գևորգ Պապոյան

Խորհրդարանը քննարկում է «Արժութային կարգավորման և արժութային վերահսկողության մասին» օրենքում փոփոխություններ կատարելու նախագիծը, որով առաջարկվում է՝ Հայաստանի քաղաքացիներին հիփոթեքային վարկերը տրամադրել միայն դրամով:

«Սրանից 2 ամիս առաջ եվրոյի փոխարժեքը 392 էր: Այն քաղաքացին, որը եվրոյով հիփոթեքային վարկ էր վերցրել, այսօր 9 տոկոս ավելի փոխարժեքով պետք է վճարի: Սա հատկապես տարածված է լինում այն դեպքերում, երբ քաղաքացիները ֆինանսական բարձր գրագիտություն չեն ունենում և տարվում են 1-2 տոկոս հիփոթեքային վարկի ավելի էժան լինելու գայթակղությամբ և հետագայում շատ մեծ խնդիրների առաջ են կանգնում»,- նախագիծը ներկայացնելիս ասել է ՔՊ-ական պատգամավոր Գևորգ Պապոյանը:

«Եթե քաղաքացին չունի արտարժութային եկամուտներ, ապա իր ռիսկերը կառավարելու համար պետք է վերցնի դրամային հիփոթեքային վարկ: Կարգավորումը վերաբերում է միայն բնակարանային հիփոթեքային վարկերին»,- ավելացրել է պատգամավորը: