Ինչպես է հաջողվել 1 տոննա կոկաին բերել Հայաստան. հարց՝ ՊԵԿ նախարարին

Պետական եկամուտների կոմիտեի նախագահ Ռուստամ Բադասյանն անդրադարձել է Հայաստան ներմուծված շուրջ 1 տոննա կոկաինի հայտնաբերման դեպքին:

Կառավարության նիստից հետո լրագրողների հետ զրույցում Բադասյանը հիշեցրել է, որ ԱԱԾ վարույթում կա քրեական գործ: «Եթե որևէ երկրից ապրանքը՝ ըստ ուղեկցող փաստաթղթերի, պետք է տեղափոխվի մեկ այլ երկիր՝ վերջնակետ, դա նշանակում է տարբեր բաներ: Տարբեր երկրների մաքսային մարմինները մշակում են ռիսկերի համակարգեր, ալգորիթմներ, որի հիման վրա պետք է վերհանեն, թե որ բեռնատարն են ստուգում: Բնականաբար, դրա մասին գիտեն նաև մաքսանենգ ճանապարհով այս կամ այն ապրանք տեղափոխող ընկերությունները և կիրառում են տարբեր մեխանիզմներ: Ինչպես մաքսային մարմինները մտածում են, թե ինչ ալգորիթմներ գրեն, որ առավել թիրախային հսկողություն իրականացնեն, այնպես էլ մաքսանենգերը մտածում են, թե ուղեկցող փաստաթղթերում ինչ տվյալներ նշեն, որ հնարավորինս խուսափեն: Այսինքն, եթե վերջնակետ նշվում է որևէ երկիր, այդ երկիր նաև բացի փաստաթղթում նշված ապրանքից կարող է տեղափոխվել թե մաքսանենգ ճանապարհով առկա ապրանք, կարող է նաև ճանապարհին կորչել այդ ապրանքը»,- ասել է Բադասյանը:
Անդրադառնալով հարցին, թե ինչպես է հաջողվել 1 տոննա կոկաին բերել Հայաստան՝ նա ասաց, որ ամբողջ աշխարհը ողողված է թմրանյութերով, և բնականաբար, այդ թմրանյութերը հայտնվում են տարբեր շուկաներում մաքսանենգ ճանապարհով՝ անցնելով մաքսային հսկողության կետեր կամ շրջանցելով մաքսային հսկողության գոտիները: Անպայման չէ, որ մաքսային հսկողության գոտիով մտնի մաքսանենգ ապրանքը:
Անդրադառնալով այլ ճանապարհներով մուտք գործելու հնարավորությանը՝ Բադասյանն օրինակ բերեց Իրանի հետ ՀՀ սահմանի դեպքերը: «Դեպքերի մեծամասնությունը ռուս սահմանապահների կողմից է հայտնաբերվում, որովհետև թմրանյութն, օրինակ, նետում են գետի վրայով կամ դրոնով տեղափոխում են և թողնում այնպիսի տեղում, որտեղից իրենց հանցակիցներն այստեղ կարող են վերցնել»,- նշել է ՊԵԿ նախագահը:

ՊԵԿ նախագահը վստահեցրեց, որ ունեն սքաներներ, շներ, օպերատիվ ինֆորմացիա ևս ունենում են: Որ դեպքում հայտնաբերում են, և, եթե կարելի է հանրայնացնել, հանրայնացնում են:

«Հայաստանը հաճախ հենց որպես տրանզիտային երկիր է դիտարկվում: Նաև եղել են դեպքեր, երբ Հայաստանի, Վրաստանի, Ուկրաինայի և մի շարք այլ երկրների մաքսային մարմինների մասնակցությամբ վերահսկելի մատակարարում ու գնում է եղել, և պարզվել է, որ Հայաստանի և Վրաստանի միջոցով ապրանքը տրանզիտ տեղափոխվել, հասել է Կիև: Եվ Կիևում եղավ այս հանցավոր խմբի բացահայտումը»,-ասաց Բադասյանը: