«Բացառվա՛ծ է, չի՛ քննարկվելու նման հարց». Մհեր Գրիգորյան

«Մոսկովյան հանդիպման ժամանակ «Զանգեզուրի միջանցքի» վերաբերյալ Ալիևի հայտարարություններն ու ՀՀ վարչապետի հակադարձումները ի՞նչ էին նշանակում»,- դիմելով ՀՀ փոխվարչապետ Մհեր Գրիգորյանին՝ հարցրին լրագրողները: «Միջանցք՝ շատ դեպքերում ընկալվել է որպես տրանսպորտային միջանցք, ինչը ընդունված տերմին է, բայց նաև շատ դեպքերում էլ ընդգծվում է միջանցք՝ այլ ցանկություն ունենալու տեսանկյունից: Երկրորդ տարբերակի հետ կապված մշտապես տվել ենք մեր պաշտոնական դիրքորոշումը, որ դա ուղղակի բացառվա՛ծ է, կարմիր գիծ է մեզ համար»,- ասաց Գրիգորյանը:

Հիշեցնենք՝ Մոսկվայում Եվրասիական տնտեսական բարձրագույն խորհրդի նիստի ընթացքում վեճ էր տեղի ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև։

Նիկոլ Փաշինյանն արձագանքել էր Ալիևի ելույթին, որի ընթացքում նա օգտագործել էր «Զանգեզուրի միջանցք» արտահայտությունը: «Ադրբեջանի նախագահը իր ելույթում օգտագործեց մի արտահայտություն, որը վերջին տարիներին ծառայում է որպես խորագիր Հայաստանին տարածքային նկրտումներ ներկայացնելու համար։

Ցանկանում եմ նշել, որ դա արվում է նոյեմբերի 9-ի հայտարարության 9-րդ կետի շրջանակում։ Ընդգծեմ, որ այդ հայտարարության մեջ խոսվում է միայն մեկ միջանցքի մասին, դա Լաչինի միջանցքն է, որը պետք է լինի ռուս խաղաղապահների վերահսկողության ներքո, բայց, ցավոք, Ադրբեջանի կողմից անօրինական շրջափակման մեջ է։ Մյուս կողմից՝ ցանկանում եմ ընդգծել, որ Հայաստանը պատրաստ է ապաշրջափակել բոլոր տրանսպորտային և տնտեսական կապերը, որոնք անցնում են Հայաստանի տարածքով»,- ասել էր Փաշինյանը: