«Նիկոլ Փաշինյանը հայկական Հերոստրատն է». Սուրեն Սուրենյանց

Նիկոլ Փաշինյանի խոսքից հասկացվեց, որ, իբրև թե, հայկական զինանշանի վրա կան խորհրդանիշեր, որոնք այլևս արդիական չեն, «24TV»-ի եթերում «Դեմոկրատական այլընտրանք» կուսակցության նախագահ քաղաքագետ Սուրեն Սուրենյանցի հետ զրույցում նշեց լրագրող Կարպիս Փաշոյանը:

«Նիկոլ Փաշինյանը հայկական Հերոստրատն է: Նա զգետնել է մեր հաղթանակն առաջին արցախյան պատերազմում և այդ հաղթանակի հետ կապված ամեն ինչը ոչնչացնելու մոլուցքով գնում է մինչև վերջ: Նա մարտահրավեր է նետել պետականության հիմքերին: Կասկածի տակ է դնում երկրի տարածքային ամբողջականությունը՝ կադաստրի վկայականի ուրվագծման ողորմածությունը հանձնելով Բաքվի ողորմածությանը: Նույնիսկ սրանից հետո Ադրբեջանը դարձյալ ոչ մի անգամ չի ասում, որ ճանաչում է Հայաստանի 29800 քառակուսի կիլոմետրը:

Մենք այսպիսի վիճակում հայտնվեցինք, երբ 1918 թվականին Բաթումիի պայմանագիրն էր կնքվում, երբ Հայաստանի Հանրապետությունը հանձնված էր Թուրքիայի ողորմածությանը: Նույն իրավիճակն է: Հիմա Նիկոլ Փաշինյանը հետևողականորեն ապացուցում է, որ պետություն չունենք, կամ դա ունենալու իրավունքը կախված է Ադրբեջանի, թերևս՝ Թուրքիայի կամքից»: