Բելառուսն ստացել է աշխարհում ամենաէժան ռուսական գազը

Բելառուսն ստացել է ռուսական գազն՝ աշխարհում ամենացածր գնով, հայտարարել է Ռուսաստանում հանրապետության դեսպան Դմիտրի Կրուտոյը ռուսական լրատվամիջոցներին տված հարցազրույցում։

Նրա խոսքով՝ այս որոշումը կայացրել է անձամբ ՌԴ նախագահ Վլադիմիր Պուտինը։ Այն վերաբերում է «Գազպրոմի» հետ պայմանագրի ողջ տևողությանը, որը կնքվել է մինչև 2031 թվականը։

Այժմ Բելառուսը հազար խորանարդ մետր գազի դիմաց վճարում է 128,52 դոլար։ Երկու երկրների նախագահները պայմանավորվել են չփոխել այս գինը ևս երեք տարի, հավելել է Կրուտոյը։

Բացի այդ, Միութենական պետությունում գազի ընդհանուր շուկայի մասին համաձայնագրի ուրվագծերը սահմանելուց հետո Ռուսաստանը և Բելառուսը համաձայնագիր կստորագրեն էլեկտրաէներգիայի ընդհանուր շուկայի մասին։ Կրուտոյի խոսքով՝ այն «մեծ հաշվով արդեն պատրաստ է»։