Պատգամավոր ամուսինները Ծաղկաձորում բնակարան են գնել. «Ժողովուրդ»

«Ժողովուրդ» օրաթերթը գրում է. «Մինչև հեղափոխությունը 100-դրամանոց երթուղայինով տեղաշարժվող Նարեկ Բաբայանի գործերը լավ են արդեն:
Ազգային ժողովի «Քաղաքացիական պայմանագիր» խմբակցության պատգամավոր Նարեկ Բաբայանի ներկայացրած հայտարարագրից տեղեկանում ենք, որ նախորդ տարի պատգամավորը Կոտայքի մարզի Ծաղկաձոր քաղաքում 27 մլն դրամ արժողությամբ բնակարան է գնել, որի համասեփականատերն է հանդիսանում։ Նա դեռ 2017 թվականին Կոտայքի մարզի Առինջ գյուղում ևս բնակարան էր գնել, որի համասեփականատերն է հանդիսանում կրկին։
Ներկայիս պատգամավորը 2021 թվականի փետրվարին 2009 թվականի արտադրության «Տոյոտա» է գնել։ Այդ ժամանակ Բաբայանը հանդիսանում էր Պետական գույքի կառավարման կոմիտեի նախագահը։ ՔՊ-ական պատգամավորը, չգիտես՝ ինչու, կանխիկ դրամ չի ունեցել, իսկ բանկային հաշիվներում նրա դրամական միջոցները կազմել են 53 հազար և 521 հազար դրամ։ Նարեկ Բաբայանը մեկ տարվա ընթացքում միայն պատգամավորական աշխատավարձից է եկամուտ ստացել, սակայն նրա ծախսերի մասին որևէ տեղեկություն հայտարարագրում առկա չէ։

Նրա կինը՝ Լենա Նազարյանը ևս ներկայացրել է իր հայտարարագիրը։ Վերջինը ևս հայտարարագրել է Ծաղկաձորի և Առինջի բնակարանները, որոնց համասեփականատերն է ամուսնու հետ, սակայն Նազարյանը դեռ 2009 թվականին Նորք-Մարաշում անհատական բնակելի տուն է ժառանգություն ստացել։ Նազարյանը ևս ամուսնու պես կանխիկ դրամ չի ունեցել, սակայն բանկային հաշիվներին 1 մլն դրամ է եղել։

Պարզվում է՝ Լենա Նազարյանն անհատ վարձակալ է և մեկ տարվա ընթացքում վարձակալությունից 1 մլն 500 հազար դրամ է ստացել, ևս 8 մլն դրամ ստացել է ԱԺ-ից, իսկ 34 հազար դրամ էլ՝ «Կանանց իրավունքների տուն» կազմակերպությունից։ Նազարյանը նաև 43 մլն դրամի վարկ ունի և 2 մլն 100 հազար դրամ է ծախսել այդ վարկի տարեկան մարման համար»:

Մանրամասները՝ թերթի համարում: