«Արցախի իրադարձությունները մանրամասն պլանավորված, Հայաստանի և Արցախի ղեկավարության հետ համաձայնեցված գործողություններ են». Անդրիաս Ղուկասյան

«Հայ կառուցողական» կուսակցության նախագահ Անդրիաս Ղուկասյանը ֆեյսբուքյան իր էջում գրել է. «Արցախում կատարվող իրադարձություններն ամիսներ առաջ մանրամասն պլանավորված, Հայաստանի և Արցախի ղեկավարության հետ համաձայնեցված գործողություններ են։ Արցախի Հանրապետությունը լուծարելու որոշումն ընդունվել է առնվազն մայիս ամսին և դրանով է պայմանավորված եղել Արցախի ղեկավար կազմում կադրային փոփոխությունները։ Երկու շաբաթ առաջ, երբ ինձ լուր հասավ Արցախի Հանրապետության նորընտիր նախագահ Սամվել Շահրամանյանի Արցախի ազգային անվտանգության ծառայության աշխատակիցների հետ հանդիպման բովանդակության և մանրամասների մասին՝ ես հրաժարվեցի դա արժանահավատ տեղեկություն համարել։ Համադրելով բոլոր փաստերը՝ կարելի է ենթադրել, որ Հայաստանի և Արցախի իշխանությունների կայացրած որոշումը եղել է․
1․ Լուծարել Արցախի Հանրապետությունը
2․ Դուրս բերել Արցախից պաշտպանության բանակի կազմը և նրանց ընտանիքները
3․ Արցախում մնացող բնակչության՝ մոտ 40000 չինովնիկների և գյուղացիների ճակատագիրը թողնել Ադրբեջանի հայեցողությանը:
Ռազմական գործողությունների ընթացքը ցույց տվեց, որ պաշտպանության բանակի բարձրագույն ղեկավարությունը սպասարկել է քաղաքական վերնախավի ընդունած որոշումը։ Այս պահին Արցախի հարցի ճակատագիրը գտնվում է ԱՄՆ-ի ղեկավարության որոշումից կախված կամ ԱՄՆ-ն կպահանջի Ադրբեջանից դուրս բերել զորքերը նախկին ԼՂԻՄ տարածքից և թույլ տալ Արցախում Եվրոմիության կողմից նշանակված կառավարում հաստատել կամ կթողնի կատարվածն առանց հետևանք։ ԱՄՆ ղեկավարության որոշումից կախված է ոչ միայն հայ-ամերիկյան հարաբերությունների ապագան այլ նաև Հարավային Կովկասի տարածաշրջանում երկարատև ժամանակահատվածում Թուրքիայի գերիշխող դիրքը։ Եվրոմիության պետությունների ղեկավարության ձեռքում են բոլոր տնտեսական լծակներն Ադրբեջանին քաղաքական որոշումներ պարտադրելու համար։ Եվրոմիության հանձնաժողովի անգործությունը ի չիք կդարձնի եվրոխորհրդարանի բանաձևերում արտահայտված դիրքորոշումն Արցախի խնդրի խաղաղ կարգավորման վերաբերյալ։
Այդ դեպքում Եվրոմիության ռազմավարական, քաղաքական պլանները՝ Վրաստանը, Հայաստանը և Ադրբեջանը ներգրավել Եվրոմիության քաղաքական դաշտում, կդառնան անիրականանալի։ ԱՄՆ-ի և Եվրոմիության համար Արցախի հարցն այսօր ոչ միայն հումանիտար ճգնաժամի խնդիր է, այլ ռազմավարական նշանակության հարց, որի հանգուցալուծումից կախված է արևմուտքի հեղինակությունն աշխարհում։
Մեզ համար առանձնահատուկ նշանակություն ունի այն փաստը, որ Արցախի վրա 2020թ․ հարձակումը և վերջին իրադարձությունները հանդիսանում են Ռուսաստանի և Թուրքիայի ուղիղ պատասխանն ԱՄՆ-ի և Ֆրանսիայի առաջարկին՝ Արցախի հարցը լուծել հանրաքվեի միջոցով։ Չոր մնացորդում՝ դա է»: