Պետդեպը՝ ԼՂ հարցով «գաղտնի» հանդիպման մասին

Սեպտեմբերի 17-ին ԱՄՆ-ի, Եվրոմիության և Ռուսաստանի բարձրաստիճան պաշտոնյաները հանդիպում են անցկացրել Ստամբուլում, որի ժամանակ քննարկել են ԼՂ-ում տիրող իրավիճակը։ Դրանից երկու օր անց Բաքուն ագրեսիա է ծավալել Արցախի և նրա ժողովրդի դեմ։

Պետդեպի խոսնակի տեղակալ Վեդանթ Փաթելը Turan-ի հետ զրույցում հաստատել է հանդիպման մասին լուրը․ «Այդ հանդիպումը գաղտնի բնույթ չի կրել։ Մենք մշտապես համագործակցում ենք տարածաշրջանում շահագրգիռ կողմերի հետ։ Սեպտեմբերի 17-ին մենք հանդիպել ենք՝ քննարկելու անհետաձգելի մարդասիրական հարցերը։ Ահա թե ինչի մասին է եղել հանդիպումը։ Հայաստանի և Ադրբեջանի միջև երկխոսությունը կարևոր նշանակություն ունի այդ վաղեմի հակամարտության կարգավորման համար։ Դա այն է, ինչի ուղղությամբ շարունակում են աշխատել պետքարտուղար Բլինքենը և այստեղ գտնվող այլ պաշտոնյաներ»,- ասել է Փաթելը։