«Հայտարարում եմ, որ սա բացարձակ սուտ է». Հրանուշ Խառատյան

Ազգագրագետ Հրանուշ Խառատյանը ֆեյսբուքյան իր էջում գրել է. «Արդեն շուրջ մեկ ամսից ավել է՝ անհասկանալի մի աղբյուր սուտ տեղեկություն է սնուցում հանրությանն այն մասին, թե իբր ԿԳՄՍ նախարարության ինչ-որ դրամաշնորհով ես հետազոտություն/պեղումներ եմ իրականացնում Հայաստանում ադրբեջանական հուշարձանների մասին՝ այս մտացածին «տեղեկությունը» ներկայացնելով հեռու գնացող մեկնաբանություններով:
Հայտարարում եմ, որ սա բացարձակ սուտ է: Ենթադրում եմ, որ իմ և իմ ընտանիքի շուրջ այս հերթական ստի աղբյուրը ինձ և իմ ընտանիքի անդամներին անվանարկելու անձնական, մեզ համար անհասկանալի նպատակ ունի, իսկ դյուրահավատ, երբեմն նաև արժեքավոր մարդիկ մոլորության մեջ ընկնելով՝ ցավոք դառնում են այս ստի տարածողներ:
Կարծում եմ, որ մեր հասարակության կյանքի ներկայիս զգայական երկատվածության, պառակտվածության, անհամաձայնության և ընդհանուր անվստահության մթնոլորտում անձնական նպատակներով այս կարգի կեղծիքներ տարածողները, ով/ովքեր էլ նա/նրանք լինեն, իրեն/իրենց հաշիվ չեն տալիս, որ միայն խորացնում են ճեղքվածքը: Գալու է, չէ՞, պղտոր ջրերի զուլալվելու ժամանակը»: