«Ուշադրությունից դուրս մնաց». Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը. «Հայտնի տեսարանը իհարկե առաջացրեց համակարգերի աշխատանքի վերաբերյալ շատ արձագանքներ։ Ուշադրությունից հերթական անգամ դուրս մնաց, ըստ իս, կարևորագույն հանգամանքի հերթական դրսևորումը, որը դարձյալ համակարգի մասին է՝ թե՛ քաղաքական, թե՛ պետական կառավարման համակարգերի տասնամյակներ շարունակվող խեղման. պատգամավորները ինչպես շարքային մի պաշտոնյա-ֆունկցիոներ ուղեկցում են իրենց քվեարկությամբ նշանակվող վարչապետին՝ շքախմբի կազմում։ Մեծ հաշվով, մեր երկրում համակարգային խեղումները սկսել ու շարունակվում են այդ կետում։ Եվ, այո, եթե վարչապետը չի ուզում հատ հատ կախիչներ ստուգել, օրինակ, ապա նախ և առաջ չպետք է ուզի, որ խորհրդարանական մեծամասնության մոտ ընկալվի իբրև վերադաս։ Այստեղ է բուն հարցը, թե ինչպիսին են իրական ցանկությունները, և նրանք, որոնք արտահայտվում են օրինակ կախիչներն «ասֆալտին փռելիս»։ Կրկնեմ, խնդիրը Հայաստանում ունի արդեն տասնամյակների գոյություն, ու շարունակվում է մինչ այսօր, ըստ իս՝ գիտակցված ընտրությամբ»: