Ադրբեջանի ԱԳՆ-ն կոշտ պատասխան է տվել Նիդերլանդներին

Ադրբեջանի ԱԳՆ-ն կոշտ է արձագանքել Նիդերլանդների հասցեին: «Նիդերլանդների արտաքին գործերի նախարար Հանկե Բրուինս Սլոթի հայտարարությունները մեր երկրի մասին անընդունելի են։ Հոլանդացի պաշտոնյան մեղադրանք է առաջադրել՝ ակնհայտորեն խեղաթյուրելով ադրբեջանական կողմի հայտարարությունները. Ցավոք սրտի, սա առաջին դեպքը չէ, երբ եվրոպական երկրների պաշտոնյաները նման անպատասխանատու հայտարարություններ են հնչեցնում։ Այս հայտարարությունները, Ադրբեջանի ներքին գործերին միջամտելու փորձի հետ մեկտեղ, վկայում են մեր տարածաշրջանի հետկոնֆլիկտային իրողությունների նկատմամբ կանխակալ վերաբերմունքի մասին»,- այս մասին ասված է Ադրբեջանի արտաքին գործերի նախարարության մամուլի ծառայության ղեկավար Այխան Հաջիզադեի մեկնաբանության մեջ։

Հիշեցնենք, որ Հանկե Բրուինս Սլոթը Նիդերլանդների խորհրդարանի արտաքին հարաբերությունների հանձնաժողովի նիստում նշել էր, որ Ադրբեջանի վերջին հայտարարությունները մտահոգություն են առաջացնում, կոչ էր արել Բաքվի հանդեպ կիրառել պատժամիջոցներ և մի շարք բացասական հայտարարություններ արել Ադրբեջանի և Հայաստանի հարաբերությունների կարգավորման գործընթացի վերաբերյալ:

«Նման մեղադրանքները, ինչպես նաև Ադրբեջանի դեմ պատժամիջոցներ կիրառելու սպառնալիքները, հարված են հասցնում Բաքվի և Եվրոմիության երկկողմ հարաբերություններին»,- ընդգծել է Ադրբեջանի ԱԳՆ-ի ներկայացուցիչը։

«Ինչ վերաբերում է մեր երկիր այցելելու՝ նախարարի մտադրությանը, ապա հայտնի է, որ Ադրբեջանը չեղյալ է հայտարարել այցը։ Ադրբեջանական կողմը հայտարարել է, որ այցի ընթացքում մտադիր է քննարկել միայն երկկողմ հարաբերությունները, այլ ոչ ադրբեջանա-հայկական հարաբերությունների կարգավորման գործընթացը կամ ներքին հարցեր։ Մենք կոչ ենք անում հոլանդական կողմին վերջ դնել տարածաշրջանի հետագա զարգացմանն ու առաջընթացին խոչընդոտող հայտարարություններին, հարգել միջազգային իրավունքի նորմերն ու սկզբունքները»,- եզրափակել է Այխան Հաջիզադեն։