«Երևանի հասարակական տրանսպորտը գոնե 3-5 տարի կարող է լինել անվճար». Վիկտոր Մնացականյան

Երևանի քաղաքապետարանի դիմաց բողոքի ակցիա է, հավաքվածները պահանջում են չեղարկել հասարակական տրանսպորտի թանկացման նախագիծը։ Կենտրոն վարչական շրջանի նախկին ղեկավար Վիկտոր Մնացականյանը լրագրողների հետ զրույցում հայտնեց իր մտահոգությունները․ «Իրենք անում են ընդամենը հասարակական տրանսպորտի վատթարացում, որովհետև այս մոդելով դա չի աշխատի, ոնց որ չաշխատեց կարմիր գծերի ծրագիրը կենտրոնում։ Կա տրանսպորտի և հասարակական տրանսպորտի տարբերություն, քաղաքային իշխանությունները խոսում են միայն հասարակական տրանսպորտի մասին, տաքսիների վերաբերյալ ոչինչ չկա, տաքսիստները իրենք ինքնուրույն պայքարում են օնլայն տաքսիների հարթակների հետ և այլն։ Քաղաքային իշխանությունները երբևէ որևէ միջազգային մասնագետների հետ չեն քննարկել, թե Երևանում հասարկական ո՞ր տրանսպորտի ուղղությունն է ճիշտ զարգացնել, օրինակ մենք առաջարկում ենք տրամվայների տարբերակը, որն ավելի կոլորիտային է ու երևանյան։ Ունեմ համոզմունք և քաղաքային իշխանություննները չկարողացան ապացուցել հակառակը, Երևան քաղաքի հասարակական տրանսպորտը գոնե 3-5 տարով կարող է լինել անվճար և այդ գումարի տեղը մենք ասում ենք»։