«Երևանի գործող իշխանությունը հավես չունի ավագանու նիստ անցկացնի»․ Մանուկ Սուքիասյան

Երևանի ավագանու «Մայր Հայաստան» խմբակցության ղեկավար Մանուկ Սուքիասյանն այսօրվա նիստի ժամանակ դեմ արտահայտվեց օրակարգում ընդգրկված չզեկուցվող հարցերի առկայությանը։ «Երևանի գործող իշխանությունն ուղղակի հավես չունի ավագանու նիստ անցկացնի»,- ասաց Սուքիասյանը՝ անդրադառնալով Ավինյանի պարզաբանմանը, թե չզեկուցվող հարցերի քանակը պայմանավորված է նրանով, որպեսզի նիստը մի քանի օր չտևի։ «Բա ավագանու բան ու գործի անունն ի՞նչ ա։ Երևանի ավագանին դառնում է անգործունյա, ոչ թափանցիկ, երևանցուն հաշվետվություն չներկայացնող մի կառույց, չզեկուցվողների անվան տակ բերվում են տարբեր շահեր սպասարկող որոշման նախագծեր՝ ուղղված տարբեր անհատների բիզնես շահերի սպասարկմանը»,- նշեց Սուքիասյանը:
Քաղաքապետ Տիգրան Ավինյանը հակադարձեց՝ հիշեցնելով, որ ընդդիմադիրների առաջարկով մեկ անգամ չզեկուցվող հարցերը դարձել են զեկուցվող, սակայն նիստերին ընդդիմադիրները չեն մասնակցել, նախագծերը քննարկել են միայն ՔՊ անդամները։