«Բացառված է Ուկրաինայի կապիտուլյացիայի ճանապարհով խաղաղությունը»․ Մակրոն

Ուկրաինայում խաղաղությունը պետք է ձեռք բերվի բանակցությունների միջոցով, սակայն դեռ բանակցությունների ժամանակը չէ, դա կորոշի Կիևը։ Այս մասին ֆրանսիական ԶԼՄ-ներին տված հարցազրույցում ասել է Ֆրանսիայի նախագահ Էմանուել Մակրոնը:

«Խաղաղությունը չի կարող լինել Ուկրաինայի կապիտուլյացիան»,- ասել է նա։

Միևնույն ժամանակ, Մակրոնը հավաստիացրել է, որ Ուկրաինա ֆրանսիական զորքեր ուղարկելն օրակարգում չէ։

Հունիսի 6-ին՝ Նորմանդիայում դաշնակից զորքերի ափհանման 80-ամյակին նվիրված միջոցառման ժամանակ, Մակրոնը հայտարարել է Կիևին մի քանի Mirage 2000-5 մարտական ինքնաթիռներ փոխանցելու, ինչպես նաև ուկրաինացի օդաչուներին ու զինծառայողներին վերապատրաստելու ծրագրի մեկնարկի մասին: Նա հստակեցրել է, որ Փարիզն առաջարկում է վերապատրաստել 4,5 հազար ուկրաինացի զինծառայողների։