«Ընտրություններում աջակողմյան ուժերի հաղթանակը կարող է հանգեցնել Կիևին աջակցության դադարեցմանը»․ Գաբրիել Աթալ

Ընտրություններում աջակողմյան ուժերի հաղթանակը կարող է հանգեցնել Կիևին աջակցության դադարեցմանը։ Այս մասին հայտարարել է Ֆրանսիայի վարչապետ Գաբրիել Աթալը, հաղորդում է BFMTV-ն։

Աթալի կարծիքով՝ ընտրություններում աջակողմյան ուժերի հաղթանակը կարող է հանգեցնել «շատ լուրջ փոփոխությունների», որոնց թվում նշվում է «Ուկրաինային աջակցության զգալի մասի դադարեցումը» և «Ռուսաստանին ենթարկվելու ռիսկը»։

Աթալը հավելել է, որ աջակողմյան ուժերի հաղթանակը կդառնա «ֆրեքզիթի» (ԵՄ-ից Ֆրանսիայի դուրսբերում) սկիզբ։

Նշենք, որ Ֆրանսիայում արտահերթ խորհրդարանական ընտրությունները կանցկացվեն երկու փուլով՝ այս տարվա հունիսի 30-ին և հուլիսի 7-ին: Վերջին հարցումների համաձայն՝ Մարին Լը Պենի և Ժորդան Բարդելայի «Ազգային միավորումը» առաջատարն է՝ 31,36 տոկոսով: