«Պետք է իշխանական քարոզիչներին և իրենց արտաքին պատվիրատուներին հիասթափեցնել». Արա Պողոսյան

Քաղաքագետ Արա Պողոսյանը ֆեյսբուքյան իր էջում գրել է. «Տպավորություն է, որ իշխանական այս հիմնական քարոզչական լրատվամիջոցը գոհ է հայ-իրանական հարաբերությունների հնարավոր սառեցմամբ և Իրանի նորընտիր նախագահի ծագումը ակնհայտորեն մանիպուլատիվ բնորոշմամբ փորձում է դարձնել պատրվակ և անոնս է անում հայ-իրանական հարաբերությունների հնարավոր լարվածության ուղղությամբ։
Թեպետ հոդվածի մեջ խոսվում է հպանցիկ այն մասին, որ երկրի արտաքին քաղաքականության վրա որոշիչ ազդեցություն ունի իսլամական հեղափոխության գերագույն գլխավոր Հոգևոր առաջնորդը և Հեղափոխության պահապանների կորպուսը, սակայն, հաշվի առնելով իշխանական քարոզչական ուղղության հիմնական սպառող սեգմենտի հանգամանքը, ակնհայտ է, որ միայն նյութի վերնագիրն է հայացքներ ձևավորելու, դրա վառ ապացույցը նյութի ներքո կատարվող կամ դեռ կատարվելիք մեկնաբանությունների բովանդակությունն է։
Սակայն պետք է իշխանական քարոզիչներին և իրենց արտաքին պատվիրատուներին հիասթափեցնել՝ Իրանի Այսրկովկասյան քաղաքականությունը չի փոխվելու և նախագահ Ռայիսիի քաղաքական կուրսը շարունակվելու է։
Իսկ հայ-իրանական հարաբերությունները ո'չ միայն խորանալու են, այլև ձևավորվելու է հայ-իրանա-հնդկական տարածաշրջանային տանդեմ»։