«Դատական իշխանության հեղինակազրկողը մեկ մարդ է»․ Արսեն Բաբայան

Փաստաբան Արսեն Բաբայանի ֆեյսբուքյան գրառումը․ «Աչքովս ընկավ, որ Պետրոս Ղազարյանի հյուրն այսօր Կարեն Անդրեասյանն է:
Անմիջապես մտածեցի, որ նա եկել է Պետրոսի մոտ հաշվետվությամբ: Հիշո՞ւմ եք նախորդ տարվա ավարտին նույն Կարեն Անդրեասյանը ինչպիսի խոստումներ էր տալիս այդ նույն տաղավարից ու խոստանում, որ այդ խոստումներն ընդամենը երկու ամսում կիրականացվեն ու ինքն էլ կգա այդ տաղավարում հաշվետվություն ներկայացնելու:
Նստեցի ու ամբողջ հարցազրույցը նայեցի: Պարզվեց անցել է արդեն 7 ամիս, բայց որևէ հաշվետվություն չհնչեց խոստումների մասին:
Մի փոքր ժամանակ ունենամ ինքս կկազմեմ այդ հաշվետվությունը և կներկայացնեմ ձեր դատին:
Ի դեպ, պետք է արձանագրեմ, որ այսօր այդ եթերում նրա կողմից հնչեցված մտքերի 94 տոկոսի հետ լիարժեք համաձայն եմ: Փաստորեն Կարենը վերջապես հասկացավ այն, ինչ ես ասում էի իրեն տարիներ առաջ, երբ ինքը ՄԻՊ էր աշխատում: Վերջապես հասկացավ, որ մեկ մեղավոր չի լինում, որ դատական ակտից մի կողմը հիմնականում դժգոհ է լինում և այլն: Բայց սա արդեն էական չէ, քանի որ այլևս դատական իշխանության հեղինակազրկողը մեկ մարդ է և այդ մեկ մարդը Կարեն Անդրեասյանի քաղաքական ղեկավարն է»։