«Իսակովի պողոտայում կեղծ շինթույլտվությամբ օբյեկտ է կառուցվում»․ քաղաքացի

«ԴՕԿ» կուսակցության հիմնադիր Վարդան Ղուկասյանը թելեգրամյան ալիքում հրապարակել է իրեն դիմած քաղաքացիներից մեկի բողոք-նամակը, որտեղ մասնավորապես գրված է․ «Երևանի քաղաքապետարանի «բարձր» հովանու ներքո տարեսկզբից սկսած հանգիստ տեմպերով կառուցվում է այս օբյեկտը Իսակովի պողոտա 7/1 հասցեում՝ Ոստիկանության վարչության հարևանությամբ։ Սա սեփական տարածք չէ, հետևաբար որևէ մեկն իրավունք չունի փակել ճանապարհի հսկայական մասը և կառուցել սեփական բիզնես։ Սակայն կեղծ շինթույլտվության և կոռուպցիայի արդյունքում, քաղաքապետի «դաբրոյով» շինարարությունը շարունակվում է։ Պատկան մարմիններից ովքեր պիտի նկատեն այս անօրինական կառույցը, ուղղակի չեն նկատում, քանի որ միայն հասարակ ժողովրդինն են նկատում, փող տվածներինը տեսանելի չէ։ Ինչպես տեսնում եք, տարածքը նաև սահմանազատված չէ»։