«Այս ծրագիրը պետք է օր առաջ կանգնեցվի»․ Տիգրան Քոչարյան
166
Կիրակի, 15 սեպտեմբերի, 2024 թ., 16:24
Մեդիափորձագետ Տիգրան Քոչարյանը ֆեյսբուքյան իր էջում գրում է. «Այսօրվա խոսքս ուղղում եմ Արցախի թեմի առաջնորդ Վրթանես եպիսկոպոս Աբրահամյանին Սրբազա՛ն Հայր, մեր բոլորիս աչքի առաջ, օգտվելով արցախահայության դժվար կացությունից և հասարակ մարդկանց որոշակի անտեղյակությւոնից, արցախահայության գլխին հերթական պատուհաս են առաջացնում։ Շուրջ հազար արցախցի երեխա պատրաստվում են ուղարկել Հունգարիա՝ երկիր, որն արտահանձնել է քնած վիճակում Գուրգեն Մարգարյանին կացնահարած Ռամիլ Սաֆարովին։ Հունգարիայի ջերմ բարեկամական վերաբերմունքը Արցախի Հանրապետության դահիճ Ադրբեջանի նկատմամբ փաստերով նկարագրված է Արցախի ՄԻՊ Գեղամ Ստեփանյանի գրառման մեջ։ Մեջբերում «Հունգարիան այն երկիրն է, որն ավանդաբար ունեցել է պրոթուրքական և պրոադրբեջանական դիրքորոշում, մասնավորապես Արցախի հարցում։ Հունգարիան այն երկիրն է, որը մարդասպան Ռամիլ Սաֆարովին արտահանձնել է Ադրբեջանին։ Հունգարիան այն երկիրն է, որ Արցախի ցեղասպանությունից և էթնիկ զտումից հետո ամենաբարձր մակարդակով՝ երկրի վարչապետի մակարդակով, մասնակցել է հայաթափված և օկուպացված Շուշիում թյուրքական պետությունների կազմակերպության գագաթնաժողովին։ Շրջափակման օրերին Արցախում տեղի ունեցողի վերաբերյալ պետք է լիներ Եվրամիության անդամ բոլոր 27 երկրների համատեղ հայտարարություն, սակայն Հունգարիան արգելափակել է այն։ Ես լավ հիշում եմ Հունգարիայի ներկայացուցչի ընդգծված պրոադրբեջանական ելույթը ՄԱԿ-ի Անվտանգության խորհրդի նիստում, երբ քննարկվում էր շրջափակման հետևանքով Արցախում ստեղծված ծանր հումանիտար վիճակը։ Այսքանից հետո արցախցի երեխաների համար ճամբարներ կազմակերպելն ուղղակի երեսպաշտություն է և էժանագին «հումանիտար ժեստ», որին պետք չէ տրվել»։ Բարդրաշնորհ Սրբազան Հայր։ Անհասկանալի է՝ ինչու այդ ծրագիրը անցկացնելու համար ընտրվել է հենց Հունգարիան, այլ ոչ թե ,օրինակ, բարեկամական Ֆրանսիան։ Անհայտ է ճամբարի անցկացմանը հատկացված միջոցների իրական աղբյուրը։ Անհայտ է, թե ով է տիրապետելու այդ երեխաների կենսաչափական տվյալներին ու ինչ նպատակով է այն օգտագործվելու ապագայում։ Անհայտ է՝ ինչո՞ւ են խաղում արցախցիների արժանապատվության հետ, օգտվելով շատերի ծանր սոցիալական ու հոգեկան վիճակից։ Եթե ուզում ես հաղթես թշնամուն, դաստիարակիր նրա երեխաներին։ Հենց այդ հրեշավոր ծրագիրն է իրականացնում Ադրբեջանը, այդ թվում իր թյուր բարեկամ Հունգարիայի միջոցով։ Սրբազան Հա՜յր, այս ծրագիրը պետք է օր առաջ կանգնեցվի, իսկ երեխաների ծնողները պետք է հստակ պատկերացնեն իրականությունը։ Սա բոլորիս արժանապատվության հարցն է, ինչպես նաև մեր արցախահայերի երեխաների ապահովագրում է թշնամի Ադրբեջանի ներկա և ապագա քայլերից։ Խոնարհաբար հայցում եմ Ձեր արձագանքը և կոչը ՀԱՍԵ Արցախի թեմի բոլոր հավատացյալներին։ Որդիական խոնարհությամբ՝ Տիգրան Քոչարյան»։
