Թրամփը զվարճացրել է Սի Ծինփինին՝ Բայդենի դիմանկարի փոխարեն տեղադրված ավտոգրիչի լուսանկարով

ԱՄՆ նախագահ Դոնալդ Թրամփը զվարճացրել է Չինաստանի նախագահ Սի Ծինփինին՝ նրան ցույց տալով ավտոգրիչի՝ փաստաթղթերի ստորագրման ավտոմատ սարքի լուսանկարը, որով ավելի վաղ Սպիտակ տանը փոխարինել էին ԱՄՆ 46-րդ նախագահ Ջո Բայդենի դիմանկարը։

2025 թվականի սեպտեմբերին ԱՄՆ նախագահի օգնական Մարգո Մարտինը հրապարակել էր տեսագրություն, որտեղ երևում էին ԱՄՆ վարչակազմերի ղեկավարների պաշտոնական դիմանկարները։ 2017-2021 թվականներին ևս ԱՄՆ նախագահի պաշտոնը զբաղեցրած գործող նախագահ Թրամփի երկու դիմանկարների միջև տեղադրված էր ավտոգրիչի շրջանակված լուսանկարը՝ Բայդենի դիմանկարի փոխարեն։ Ավելի ուշ Թրամփը հայտարարել էր, որ մտադիր չէ Բայդենի դիմանկարը վերադարձնել Սպիտակ տուն և դրա փոխարեն ցանկանում է այնտեղ թողնել ավտոգրիչի լուսանկարը։