«Մինչ Արցախի վրա հարձակվելը, տեղի ունեցան առանցքային իրադարձություններ»․ Դավիթ Մանուկյան

«Ապրելու երկիր» կուսակցության քաղաքական խորհրդի անդամ Դավիթ Մանուկյանի գրառումը․ «Մեկ տարի առաջ այս օրը՝ 2023 թվականի սեպտեմբերի 19-ին, Ադրբեջանը լայնածավալ ռազմական հարձակում սկսեց Արցախի դեմ, որը հանգեցրեց հարյուրավոր զոհերի, այդ թվուն նաև երեխաներ։ Ավելի քան 120.000 մարդ ենթարկվեց բռնագաղթման, իրենց պատմական հայրենիքից։ Արցախը ամբողջությամբ հայաթափվեց։
Մինչ Արցախի վրա հարձակվելը, տեղի ունեցան մի շարք առանցքային իրադարձություններ, որոնք և ամբողջությամբ արձակեցին Բաքվի բռնապետական ռեժիմի արյունոտ ձեռքերը։
Թերևս ամենակարևորը դա Հայաստանի Հանրապետության վարչապետ՝ Նիկոլ Փաշինյանի կողմից Արցախի ճանաչումն էր Ադրբեջանի կազմում, որը Ադրբեջանին տվեց «լեգիտիմ» իրավունք իրականացնել ռազմական հարձակում Արցախի վրա։
2022 թվականի դեկտեմբերի 12-ից Ադրբեջանը փակեց Արցախը Հայաստանի Հանրապետությանը կապող միակ ճանապարհը, ինչով և սկիզբ դրվեց Արցախի ամբողջական շրջափակմանը, որը տևեց ավելի քան 9 ամիս՝ մինչև Ադրբեջանի կողմից լայնամաշտաբ հարձակումը։ Սրա նպատակը մեկն էր՝ հյուծել Արցախը, որպեսզի արցախցիները չկարողանան դիմադրություն ցույց տալ ադրբեջանական զինված ուժերի պլանավորվող հարձակմանը։
Չնայած Արցախում տիրող ծանր հոգեբանական վիճակի, քաղցից հյուծված բնակչությանը, խիստ սահմանափակ ռազմական հնարավորությունների՝ Արցախի հերոսական ժողովուրդը տվեց իր արժանապատվության կռիվը՝ թշնամուն պատճառելով հսկայական մարդկային կորուստներ։
Փառք ու պատիվ բոլոր նահատակներին:
Թող խաղաղվեն անմեղ զոհերի հոգիները»։