«Ադրբեջանին օգնում են այն հայերը, ովքեր արդարացնում են հայրենի տարածքների զավթումը»․ Արա Պողոսյան

Քաղաքագետ Արա Պողոսյանը ֆեյսբուքյան իր էջում գրել է․ «Արձանագրենք՝ Հայաստանի և հայերի դեմ շարունակվում է նարատիվային պատերազմը: Ադրբեջանը նարատիվային պատերազմի առավել վտանգավոր տեխնոլոգիաներ է կիրառում, ինչը վկայում է դրանց կազմակերպվածության, մշակվածության, մեթոդական պլանավորվածության, ռեսուրսների բաշխման մասին: Սա վկայում է շատ շոշափելի արդնուքի հետապնդման մասին, իսկ դա ոչ այսօր, այլ վաղը կլինի:
Նարատիվային պատերազմի նպատակն է երկարաժամկետ հեռանկարում սպասվելիք ագրեսիվ գործողությունների համար ստեղծել պատմական, բարոյական, քաղաքական, մշակութային և նարատիվային հիմք: Ու կստեղծեն, որովհետեւ այդ հարցում Ադրբեջանին օգնում են նաև այն հայերը, ովքեր արդարացնում են հայրենի տարածքների զավթումը:
Հիշեք մի բան՝ ապագայում Ադրբեջանի գործողությունների դեպքում մեղավորներ փնտրեք նախ Հայաստանում ու այն հայերի մեջ, ովքեր արդարացնում են Ադրբեջանի գործողությունները:
Ի դեպ՝ բոլոր մեծ պատերազմներից մի քանի տարի առաջ սկսվել է հենց նարատիվային պատերազմը:
Հ. Գ. Հետո չասեք՝ «չենք իմացել Ադրբեջանի նպատակները», «վաայ, ինչ անսպասելի էր», «ով կմտածեր», «ախր մենք արել ենք, ինչ ուզել են», «Վայ, Ռուսաստանն է մեղավոր», «Քա վաայ, Թրամփն է մեղավոր» ու նման էություններ»։